कोल्हापूर : शहरातील खुल्या जागा व इमारतीवरील वार्षिक भांडवली मूल्य आकारणी, पुस्तकातील नोंदी, तक्रारी व हरकती असतील, तर त्या आजपासून दि. ५ मार्चअखेर सादर कराव्यात, असे आवाहन महापालिकेच्या घरफाळा विभागाच्यावतीने एका पत्रकाद्वारे करण्यात आले आहे.
शहरातील सर्व मिळकतधारक, भोगवटाधारक अथवा वटमुखत्यार प्रतिनिधी संबंधितांनी महाराष्ट्र महानगरपालिका अधिनियमामधील तरतुदीनुसार मिळकतीत आवश्यक असलेल्या नोंदी पूर्ण करण्यात आलेली असेसमेंट बुके त्यात योग्य वाटतील असे फेरफार करून नवीन वर्षाच्या नोंदी म्हणून स्वीकारण्यात येणार आहेत. या मिळकत कर आकारणीची बुके नियम १४ प्रमाणे संबंधितांना पाहण्यासाठी व त्यातून उतारे घेण्यासाठी महानगरपालिकेच्या विभागीय कार्यालयाकडील कर आकारणी ऑफिसमध्ये ठेवण्यात आली आहेत.
ज्या खुल्या जागा व इमारतीवरील भांडवली मूल्याची रक्कम कर भरावयास पात्र असलेल्या इसमाचे नाव, कुळे गेली, नवीन कुळे आली किंवा कर आकारणी तक्त्यांमध्ये नाव, पत्ता अगर इतर फेरफार, दुरुस्ती वगैरेसाठी ज्या कोणास तक्रारी अगर हरकती सादर करावयाच्या असतील त्यांनी आजपासून दि. ५ मार्चपर्यंत लेखी अर्जासोबत सन २०२०-२०२१ अखेर घरफाळा भरलेल्या पावतीची छायांकित प्रत कागदपत्राच्या पुराव्यासह संबंधित नागरी सुविधा केंद्रामध्ये दाखल करून त्याची पोहोच घ्यावी, असेही पत्रकात म्हटले आहे.