प्रकाश पाटील
लोकमत न्यूज नेटवर्क
कोपार्डे - कोरोनाची दुसरी लाट सुरू झाल्यानंतर करवीर तालुक्यातील कोरोना रुग्णांची संख्या वेगाने वाढली होती. इतर तालुक्याच्या तुलनेत करवीर तालुक्यातील कोरोना रुग्णांची संख्या दुप्पट, तिप्पट असल्याने तालुका हॉटस्पॉट झाला होता. गेल्या १५ दिवसांपासून करवीर रुग्णांची संख्या वेगाने कमी होत असून, तालुक्यातील ११८ गावांपैकी ७५ गावे कोरोनामुक्त झाली आहेत. रुग्णसंख्या घटल्यामुळे करवीरला दिलासा मिळाला आहे
करवीर तालुक्यात एप्रिल महिन्यात कोरोनाची दुसरी लाट सुरू झाली होती. सुरुवातीला कोरोना रुग्णांची संख्या नगण्य होती. जून महिन्यात शहरालगतच्या गावांबरोबर ग्रामीण भागातही दुसऱ्या लाटेत कोरोनाने हाहाकार माजवला. अनेक गावांत ॲक्टिव्ह रुग्णांची संख्या २०० ते २५० वर पोहोचली होती. दररोज सापडणाऱ्या ॲक्टिव्ह रुग्णांची संख्या ४०० ते ६०० वर पोहोचली होती.
कोरोनाला रोखण्यासाठी अनेक गावांत लॉकडाऊनची अंमलबजावणी करण्यात येत होती; पण ॲक्टिव्ह रुग्णांची संख्या कमी येत नव्हती. दररोज कोरोनामुळे मृतांची संख्या ही आठ ते नऊवर पोहोचल्याने आरोग्य विभागापुढे मोठे आव्हान निर्माण झाले होते. गेल्या १५ दिवसांपासून मात्र कोरोना रुग्णांची संख्या वेगाने कमी होत असल्याने तालुक्याला दिलासा मिळाला आहे.
चौकट
आजअखेर कोरोनाच्या दुसऱ्या लाटेतील परिस्थितीचा लेखाजोखा
एकूण रुग्णसंख्या - २२९९०
बरे झालेली रुग्णसंख्या - २२३४२
कोरोनाने मृत्यू - ४३०
सध्या ॲक्टिव्ह रुग्ण - २१८
कोरोनामुक्त गावे - ७५