डोंबिवली - कल्याण डोंबिवली महापालिका निवडणुकीआधी बरीच उलथापालथ पाहायला मिळाली. या निवडणुकीत भाजपा आणि शिंदेसेना यांच्यात पक्षप्रवेश कार्यक्रमांची चढाओढ लागली होती. त्यात भाजपाने मनसेचे माजी नगरसेवक असलेले प्रकाश भोईर आणि सरोज भोईर यांना पक्षात घेतले होते. मात्र याठिकाणी तर भाजपाचे विकास म्हात्रे आणि त्यांच्या पत्नीने शिंदेसेनेत प्रवेश केला होता. यामुळे प्रभाग क्रमांक २२ येथील राजकीय समीकरण बदलले.
कल्याण डोंबिवली महापालिकेत सुरुवातीला भाजपा आणि शिंदेसेना युती होईल का अशी शंका होती. मात्र शेवटच्या क्षणी भाजपा शिंदेसेनेची युती झाली. या युतीत प्रभाग क्रमांक २२ मध्ये शिंदेसेनेतून इच्छुक असलेले संदेश पाटील आणि त्यांची पत्नी रसिका पाटील यांना उमेदवारी मिळाली नाही. त्यामुळे संदेश पाटील आणि रसिका पाटील यांनी मनसेचे माजी आमदार राजू पाटील यांच्या नेतृत्वात मनसेत प्रवेश केला. मनसेनेही संदेश पाटील आणि रसिका पाटील यांना प्रभाग क्रमांक २२ मधून उमेदवारी दिली आणि या दोघांनी या संधीचे सोने केले.
प्रभाग क्रमांक २२ मध्ये मनसेतून भाजपात आलेले प्रकाश भोईर यांना भाजपाने उमेदवारी दिली होती. मात्र मनसेच्या संदेश पाटील यांनी प्रकाश भोईर यांचा पराभव केला. प्रभाग क्रमांक २२ मध्ये शिंदेसेनेचे विकास म्हात्रे त्यांची पत्नी कविता म्हात्रे या दोन्ही निवडून आले. तसेच या प्रभागात मनसेचे संदेश पाटील आणि त्यांची पत्नी रसिका पाटील हे दोघेही निवडून आले. विशेष म्हणजे या प्रभागातील मनसे आणि शिंदेसेनेच्या विजयानंतर दोन्ही पक्षांच्या कार्यकर्त्यांनी एकत्र जल्लोष केला. डोंबिवली मध्य आणि पश्चिम भागात मनसेला तरुणांचा मिळणारा प्रतिसाद ही भाजपासाठी डोकेदुखी ठरली. प्रभाग क्रमांक २२ मध्ये मनसेतून भाजपात गेलेले प्रकाश भोईर आणि शिंदेसेनेतून मनसेत आलेले संदेश पाटील यांच्यात चुरशीचा सामना झाला. त्यात मनसेचे संदेश पाटील विजयी झाले.
वडील विजयी, लेक पराभूत
दरम्यान, कल्याण डोंबिवली महानगरपालिका निवडणुकीमध्ये डोंबिवलीतून मनसेने सगळ्यात पहिलं खातं खोलले. प्रभाग क्रमांक २१ मध्ये मनसेचे प्रल्हाद म्हात्रे यांनी भाजपाचे उमेदवार प्रदीप जोशी यांचा पराभव केला. मात्र याच प्रभागातून प्रल्हाद म्हात्रे यांची कन्या वेदांगी म्हात्रे उमेदवारीच्या रिंगणात होत्या. परंतु वेदांगी यांना पराभवाचा सामना करावा लागला. परंतु वडिलांचा विजय झाल्यामुळे वेदांगी यांच्या डोळ्यात आनंदाश्रू होते आणि त्यांनी वडिलांना मिठी मारली.
Web Summary : In Dombivli, MNS retaliated against BJP for poaching leaders. MNS candidates Sandesh Patil and his wife Rasika Patil won against BJP's Prakash Bhoir. MNS and Shinde Sena celebrated victories together, signaling challenges for BJP.
Web Summary : डोंबिवली में, मनसे ने भाजपा द्वारा नेताओं को लुभाने का बदला लिया। मनसे उम्मीदवार संदेश पाटिल और उनकी पत्नी रसिका पाटिल ने भाजपा के प्रकाश भोईर को हराया। मनसे और शिंदे सेना ने मिलकर जीत का जश्न मनाया, जो भाजपा के लिए चुनौती का संकेत है।