लोकमत न्यूज नेटवर्क
जळगाव : फुफ्फुस ३८ टक्के काम करीत असताना त्यातच उच्च रक्तदाबासह ॲन्जीओप्लास्टी झालेल्या ७० वर्षीय वृद्धावर शासकीय वैद्यकीय महाविद्यालय व रुग्णालयात म्युकरमायकोसिसची शस्त्रक्रिया करून या रुग्णाला बरे करण्यास डॉक्टरांच्या पथकाला यश आले आहे.मंगळवारी ही अतिजोखमीची शस्त्रक्रिया पार पडली.
अयोध्यानगरातील एका ७० वर्षीय रुग्णाच्या हृदयाची क्षमता वाढविण्यासाठी ८ वर्षांपूर्वी ॲन्जीओप्लास्टी करण्यात आली होती. तसेच रुग्णाच्या मेंदूला रक्तपुरवठा कमी होत असल्याचा त्रास सुद्धा होता. त्यानंतर रुग्णास म्युकरमायकोसिस आजाराची बाधा झाली. उपचारासाठी त्यांना येथील शासकीय वैद्यकीय महाविद्यालय व रुग्णालयाच्या सी-२ कक्षात दाखल करण्यात आले होते. या ठिकाणी रुग्णाच्या आजाराचे निदान झाल्यानंतर औषधोपचार सुरु करण्यात आले. या रुग्णास महात्मा ज्योतिराव फुले जनआरोग्य योजनेतून उपचार मोफत करण्यात आले. वैद्यकीय तपासणीनंतर रुग्णाची शस्त्रक्रिया मंगळवारी करण्यात आली.
यामुळे जोखीम वाढली
रुग्णाचे फुफ्फुस ३८ टक्केच काम करीत असल्यामुळे रुग्णास भूल देणे अतिजोखमीचे होते. या सर्व परिस्थितीत रुग्णाला मृत्यूच्या दाढेतून बाहेर काढण्यास वैद्यकीय पथकाच्या टीमला यश आले. दंत शल्यचिकित्सा विभागाचे प्रमुख डॉ.इम्रान पठाण, डॉ.श्रृती शंखपाळ, कान, नाक, घसा विभागाचे प्रमुख डॉ.अक्षय सरोदे, डॉ.हितेंद्र राऊत यांच्यासह सूक्ष्मजीव शास्त्र विभागाचे प्रमुख डॉ.किशोर इंगोले, बधिरीकरण शास्त्र विभागाचे प्रमुख डॉ. संदीप पटेल, डॉ. अनिल पाटील, डॉ. काजल साळुंखे, डॉ. सचिन पाटील, डॉ. स्वप्निल इंकणे, शल्यचिकित्सा विभागाचे डॉ. उमेश जाधव यांनी शस्त्रक्रियेत परिश्रम घेतले.