जिल्हा निवृत्त सेवा संघातर्फे मुख्यमंत्री सहाय्यता निधीस मदत
जळगाव : जळगाव जिल्हा निवृत्त सेवा संघातर्फे कोरोनाकाळात मुख्यमंत्री सहाय्यता निधीस ३ लाख ३५ हजारांची मदत करण्यात आली आहे. या निधीच्या संकलनासाठी सेवा निवृत्त प्राथमिक शिक्षक सभासदांकडून स्वेच्छेने आर्थिक मदत करण्यात आली. याबद्दल संघाचे जिल्हाध्यक्ष सदाशिव सोनवणे यांनी सर्वांचे आभार मानले.
भुसावळ विभागाला दक्षता शिल्ड प्राप्त
जळगाव : मध्य रेल्वेच्या रेल्वे सप्ताहनिमित्त भुसावळ विभागाला मंगळवारी दक्षता शिल्ड प्राप्त झाल्या. डीआरएम विवेककुमार गुप्ता यांनी दक्षता शिल्ड स्वीकारल्या. यावेळी रेल्वेच्या विविध विभागांचे अधिकारी उपस्थित होते.
मराठी भाषा संवर्धन पंधरवाडा उत्साहात
जळगाव : महाराणा प्रताप महाविद्यालयात मराठी भाषा संवर्धन पंधरवाडाचा नुकताच समारोप करण्यात आला. मुख्याध्यापिका साधना शर्मा यांच्या हस्ते या पंधरवाड्याचे उद्घाटन झाले. यावेळी ग्रंथप्रदर्शन, कथाकथन स्पर्धा, अभिवाचन स्पर्धा, मराठी गीत गायन स्पर्धा, काव्य वाचन स्पर्धा, हस्ताक्षर स्पर्धा, निबंध स्पर्धा आदी कार्यक्रम घेण्यात आले. सूत्रसंचालन व आभार किरणकुमार पाटील यांनी केले.
बसस्थानकात डांबरीकरणाला सुरूवात
जळगाव : नवीन बसस्थानकात खड्ड्यांमुळे प्रवाशांना मोठा त्रास सहन करावा लागत असल्याने, प्रवाशांमधून मोठ्या प्रमाणावर तक्रारी करण्यात येत होत्या. त्या अनुषंगाने आगार प्रशासनातर्फे नुकतेच आगारात डांबरीकरणाच्या कामाला सुरूवात करण्यात आली आहे. या कामाचे प्रवाशांमधून स्वागत करण्यात येत आहे.