चाळीसगाव हादरले! रिक्षासाठी पैसे न दिल्याने मुलाने जन्मदात्या पित्याला संपवले; बेल्ट आणि काठीने मारहाण

चाळीसगावात एका मुलाने पैसे न दिल्याच्या कारणावरुन पित्याची निर्घृण हत्या केली.

Jalgaon Crime: जळगाव जिल्ह्यातील चाळीसगाव शहरातून माणुसकीला काळिमा फासणारी एक अत्यंत धक्कादायक घटना समोर आली आहे. आपल्या हट्टापायी पोटच्या मुलाने जन्मदात्या वडिलांचीच काठी आणि बेल्टने बेदम मारहाण करून हत्या केल्याचा प्रकार उघडकीस आला आहे. या घटनेमुळे संपूर्ण परिसरात खळबळ उडाली असून नात्यातील क्रूरतेचा चेहरा समोर आला आहे.

मिळालेल्या माहितीनुसार, चाळीसगाव शहरातील एम.जी. नगर भागात भिकन राणा मोरे (६८ वर्षे) हे आपल्या कुटुंबासह वास्तव्यास होते. त्यांचा मुलगा कल्पेश मोरे हा गेल्या काही दिवसांपासून नवीन रिक्षा खरेदी करण्यासाठी वडिलांकडे पैशांचा तगादा लावत होता. वडिलांनी आर्थिक परिस्थिती किंवा इतर कारणांमुळे त्याला पैसे देण्यास असमर्थता दर्शवली होती. याच कारणावरून घरात गेल्या अनेक दिवसांपासून पिता-पुत्रामध्ये खटके उडत होते.

संतापाचा कडेलोट आणि निर्घृण हत्या

शनिवारी सायंकाळी पुन्हा एकदा कल्पेशने वडिलांकडे पैशांची मागणी केली. वडिलांनी स्पष्ट शब्दांत नकार देताच कल्पेशचा संताप अनावर झाला. रागाच्या भरात त्याने घरातील लाकडी काठी आणि कमरेचा पट्टा काढून ६८ वर्षीय वृद्ध वडिलांवर हल्ला चढवला. त्याने आपल्या पित्याला इतकी अमानुष मारहाण केली की, भिकन मोरे हे रक्ताच्या थारोळ्यात कोसळले. कुटुंबीयांनी त्यांना गंभीर अवस्थेत तातडीने रुग्णालयात हलवले, मात्र दुर्दैवाने उपचारापूर्वीच त्यांचा मृत्यू झाला होता. रुग्णालयात पोहोचल्यानंतर डॉक्टरांनी त्यांना मृत घोषित केले.

आईच्या फिर्यादीवरून मुलाला बेड्या

पतीची पोटच्या मुलानेच हत्या केल्याचे पाहून पत्नी सखुबाई मोरे यांच्यावर दुःखाचा डोंगर कोसळला आहे. त्यांनी दिलेल्या तक्रारीवरून चाळीसगाव पोलिसांनी आरोपी मुलगा कल्पेश मोरे याच्याविरोधात खुनाचा गुन्हा दाखल केला आहे. पोलिसांनी घटनेचे गांभीर्य ओळखून तातडीने तपासचक्रे फिरवली आणि आरोपी कल्पेशला अटक केली आहे. स्थानिक नागरिकांनी हळहळ व्यक्त केली असून, आरोपीला कठोर शिक्षा व्हावी अशी मागणी केली जात आहे. पोलीस या प्रकरणाचा अधिक तपास करत असून, या हत्येमागे आणखी काही कारणे आहेत का, याचाही शोध घेतला जात आहे.