Shocking: अभ्यास करत नाही म्हणून आई ओरडली; रागात अल्पवयीन मुलानं आयुष्य संपवलं!

Jalgaon News: जळगाव शहरात एक अत्यंत धक्कादायक आणि मन सुन्न करणारी घटना घडली.

जळगाव शहरात एक अत्यंत धक्कादायक आणि मन सुन्न करणारी घटना घडली. अभ्यासावरून आईने रागावल्याचा राग मनात धरून, जळगावमधील जोशी कॉलनी परिसरातील एका १५ वर्षीय विद्यार्थ्याने गळफास घेऊन आपली जीवनयात्रा संपवली. या घटनेमुळे परिसरात हळहळ व्यक्त होत आहे. याप्रकरणी स्थानिक पोलिसांनी अकस्मात मृत्युची नोंद केली असून पुढील तपासाला सुरुवात केली आहे. 

प्रथम हरीश कटारे (वय १५) असे मृत विद्यार्थ्याचे नाव आहे. प्रथम हा इयत्ता आठवीत शिक्षण घेत होता. मिळालेल्या प्राथमिक माहितीनुसार, प्रथम अभ्यासाकडे दुर्लक्ष करत असल्याने त्याची आई त्याला रागावली. आईचे बोलणे मनाला लागल्याने, घरात कोणीही नसताना प्रथमने छताला गळफास लावून आत्महत्या केली. घटनेची माहिती मिळताच एमआयडीसी पोलिसांनी घटनास्थळी धाव घेतली. याप्रकरणी अकस्मात मृत्युची नोंद करण्यात आली आहे. पोलिस या प्रकरणाचा अधिक तपास करत असून कुटुंबातील सदस्यांचे जबाब नोंदवण्यात येत आहेत.

भुसावळ: महिलेची गळफास घेऊन आत्महत्या

भुसावळ शहरातील मोरेश्वर नगर परिसरात ३५ वर्षीय गृहिणीने गळफास घेऊन आत्महत्या केल्याची धक्कादायक घटना उघडकीस आली आहे. दर्शना उर्फ भारती दिपक तायडे असे मृत महिलेचे नाव आहे. बुधवार, २५ फेब्रुवारी रोजी दुपारी सुमारे २.२० वाजेच्या सुमारास त्यांनी राहत्या घरातील बेडरूममध्ये सिलिंग फॅनला साडीच्या सहाय्याने गळफास घेतल्याची माहिती पोलिसांनी दिली. शेजाऱ्यांच्या निदर्शनास प्रकार आल्यानंतर तातडीने पोलिसांना कळविण्यात आले. भुसावळ शहर पोलिसांनी घटनास्थळी पंचनामा करून मृतदेह ताब्यात घेतला. या प्रकरणी अकस्मात मृत्यूची नोंद करण्यात आली आहे. पुढील तपास पोलीस कॉन्स्टेबल सुबोध चौधरी करीत आहेत.