सचिन देव
जळगाव : कोरोनामुळे गेल्या वर्षी शासनातर्फे पंढरपूरची यात्रा स्थगित करण्यात आली होती. फक्त मोजक्याच पालख्यांना पंढरपुरात प्रवेश दिला होता. तर यंदाही कोरोनामुळे तशीच परिस्थिती उद्भवली आहे. पंढरपूरच्या विठ्ठलाला कधी भेटणार, याची आस वारकऱ्यांना लागली आहे. तर दुसरीकडे याचा परिणाम एसटी महामंडळाच्या उत्पन्नावरही झाला आहे. कोरोनामुळे पंढरपुरात इतर वारकऱ्यांना प्रवेश नसल्यामुळे, एसटी महामंडळाच्या जळगाव विभागाला गेल्या वर्षाप्रमाणे यंदाही २० लाखांचा फटका बसला आहे. यंदा फक्त मुक्ताईनगर येथून एसटीने एकच पालखी पंढरपूरला जाणार असल्याची माहिती महामंडळ प्रशासनातर्फे देण्यात आली.
जळगाव आगारासह जिल्ह्यातील प्रत्येक आगारातून पंढरपूरसाठी स्वतंत्र १५ ते २० बसेस रवाना होतात; मात्र गेल्या वर्षाप्रमाणे यंदाही शासनाने कोरोनाच्या पार्श्वभूमीवर आषाढीची वारी रद्द केल्यामुळे परिणामी यामुळे बससेवाही बंद ठेवण्यात आली आहे.
इन्फो :
दरवर्षी पंढरपूरसाठी सोडल्या जाणाऱ्या बसेस : दररोज ११
दररोज मिळणारे उत्पन्न : दोन ते अडीच लाख
एसटीतून दरवर्षी पंढरपूरसाठी प्रवास करणाऱ्यांची संख्या : पाच हजार
इन्फो :
जिल्हातून दरवर्षी जाणाऱ्या पालखी
पंढरपूरसाठी जिल्ह्यातून मुक्ताईनगर येथील संत मुक्ताई पालखी, अमळनेर येथून प्रसाद महाराजांची पालखी, जळगावातील ग्रामदैवत श्रीराम मंदिराची संत मुक्ताई राम पालखी यासह अनेक धार्मिक संस्थानतर्फे पालखी व पायीवारी काढली जाते. साधारणत: लहान-मोठ्या १५ ते २० पालख्या पंढरपूरला जात असतात.
इन्फो :
यंदा एसटीने जाणार एकच पालखी
कोरोनामुळे शासनाने यंदाही पंढरपूर येथील यात्रोत्सव रद्द केला आहे. आषाढी एकादशीनिमित्त राज्यभरातून फक्त मानाच्या दहा पालख्यांनाच पंढरपुरात येण्याची परवानगी दिली आहे. यात जळगाव जिल्ह्यातील मुक्ताईनगर येथील संत मुक्ताई पालखीचा समावेश आहे. ही पालखी शिवशाही बसने १८ रोजी सायंकाळी पंढरपूरकडे रवाना होणार आहे.
इन्फो :
वारकऱ्यांचेही गावी मन रमेना !
मी दरवर्षी एसटी बसने पंढरपूरला यात्रोत्सवासाठी जात असते. गेल्या अनेक वर्षापासून हा नित्यक्रम सुरू आहे; मात्र कोरोनामुळे गेल्या वर्षी जाता आले नाही आणि यंदाही जाता येणार नाही. त्यामुळे कधी पंढरपूरला जाणार, याची ओढ लागली आहे. शासनाने यंदा तरी परवानगी द्यायला हवी होती.
विमलवाई पाटे, वारकरी.
प्रकृतीअभावी पायीवारी करणे शक्य नसल्याने, मी दरवर्षी बसने पंढरपूरला जात असतो. पंढरीची वारी म्हणजे एक वेगळाच आनंद असतो; मात्र गेल्या वर्षाप्रमाणे कोरोनाने यंदाही आमच्या वारीचा आनंद हिरावून घेतला आहे. त्यामुळे विठूरायाचे दर्शन आता कधी होणार, याची आस लागून आहे.
लक्ष्मण चौधरी, वारकरी.
इन्फो :
दरवर्षी पंढरीची वारी म्हणजे एसटी महामंडळासाठी उत्पन्नाची एक पर्वणी असते. या पंढरपूरच्या यात्रोत्सवातून दरवर्षी साधारणत: २० लाखांपर्यंत उत्पन्न मिळत असते; परंतु यंदा कोरोनामुळे पंढरपूर येथील यात्रोत्सव रद्द झाल्याने महामंडळाचे यंदाही २० लाखांचे उत्पन्न बुडणार आहे.
दिलीप बंजारा, विभाग नियंत्रक, एसटी महामंडळ.