सूत्रांनी दिलेल्या माहितीनुसार, मविप्र प्रकरणात अनेक अधिकाऱ्यांनी खोटे व दिशाभूल करणारे पत्रव्यवहार केले असून चुकीचे आदेश काढले असल्याचे समोर येत आहेत. त्यामुळे हे सर्वच अधिकाऱ्यांची चौकशी केली जाणार आहे. तक्रारदार ॲड. विजय पाटील यांनी पुरविलेल्या माहितीचीही पोलिसांकडून पडताळणी केली जात आहे. मंत्रालयात शिक्षण व उच्च शिक्षण विभागाचे सचिव, मुख्य सचिव व इतर अशा तीन ठिकाणी, पुण्यात दोन ठिकाणी, नाशिक येथेही दोन ठिकाणी पोलिसांनी पत्रव्यवहार केला आहे.
सदाशिव पेठेतील फ्लॅटमध्ये आढळले बीएचआरचे कागदपत्रे
तानाजी भोईटे, नीलेश भोईटे व इतरांनी ॲड. विजय पाटील यांना ज्या सदाशिव पेठेतील फ्लॅटमध्ये डांबून ठेवले होते, त्याच फ्लॅटमध्ये १० जानेवारी रोजी कोथरूड पोलिसांनी पंचनामा केला असता त्यात बीएचआर व सूरज झंवर याच्याशी संबंधित कागदपत्रे आढळून आली आहेत. त्याच कागदपत्राच्या आधारावर पोलीस सूरजपर्यंत पोहोचले. हा फ्लॅट सुनील झंवरचा असल्याचे सांगितले जात आहे.
प्रशासक, निवडणूक व चॅरिटी कायद्याची माहिती
ॲड. विजय पाटील यांनी प्रशासकापासून तर सहकार कायद्याने घेण्यात आलेली निवडणूक, कार्यभार हस्तांतरण आदेश यासह इतर माहिती पोलिसांना पुरविली आहे, त्याच आधारावर संस्थेचे आर्थिक व्यवहार संचालक मंडळाशिवाय दुसऱ्या गटाच्या नावे करावे म्हणून कोणाचे पत्र होते, याची माहिती घेण्यासाठी मविप्रचे खाते असलेल्या जिल्हा मध्यवर्ती सहकारी बँकेलाही पत्र देण्यात आले आहे. मराठा विद्या प्रसारक संस्थेवर प्रशासक बसविण्यात आला होता. सहकार विभागाने निवडणूक कार्यक्रम जाहीर करून तेथे निवडणुका घेतल्या होत्या. संस्थेची सहकार कायद्यानुसार निवडणूक केव्हा, कोणत्या कालावधीसाठी घेण्यात आली होती, याबाबत जिल्हा उपनिबंधकांनाही पत्र देण्यात आले आहे.