खिडकीतून मारली खाली उडी
भुसावळ : शहरातील बाजारपेठेत असलेल्या एका खासगी रुग्णालयात तळवेल येथून विषबाधेमुळे उपचारार्थ आलेल्या ४५ वर्षीय रुग्णाने पहिल्या मजल्यावरील आयसीयूच्या खिडकीतून उडी मारत पसार होण्याचा प्रयत्न केला. त्याच वेळेस वॉर्डबॉयने रुग्णास पकडून आणले. सुदैवाने त्याला कोणतीही दुखापत झाली नाही.
शहरातील एका खासगी रुग्णालयात तळवेल येथील विष बाधित रुग्ण मिलिंद जगन्नाथ पाटील (वय ४५) याच्यावर आयसीयूमध्ये उपचार सुरू होते. मात्र, या दरम्यान रुग्णाने पहिल्या मजल्यावरील आयसीयू कक्षाच्या खिडकीतून चार फूट खाली असलेल्या पत्राच्या शेडवर पहिली उडी घेतली व दुसरी सहा फूट खाली रस्त्यावर अशा दोन उड्या मारत बाजाराकडे पळ काढला. त्याक्षणी रुग्णालयातील वॉर्डबॉय यांनी त्याच्या मागे धावत त्याला पकडून आणले. ही बाब रुग्णालयाकडून बाजारपेठ पोलिसांना कळविण्यात आली आहे. बाजारपेठेचे उपनिरीक्षक गणेश धुमाळ यांनी भेट देत रुग्णाचा जबाब घेत चौकशी केली.
दरम्यान, या घटनेची दिवसभर या परिसरामध्ये चर्चा दिसून आली.