युक्तीवादात ॲड.चव्हाण यांनी सांगितले की, विवेक ठाकरे यांच्यात टेम्परींग करण्याची ताकद आहे. पोलीस कोठडीत असताना त्यांनी ठेवीदारांची ९ शपथपत्रे करुन घेतली. यावर आरोपीचे वकील उमेश रघूवंशी यांनी आक्षेप घेतला. कोठडीत असताना कसे काय हे करु शकतो. पोलिसांनी इतरांशी बोलायला सवलत दिली होती का? असा आक्षेप नोंदविला. आम्ही ठेवीदारांकडे गेलो नाही. ते आमच्याकडे आले होते, असे सांगितले. दोन्ही वकिलांमध्ये बराचवेळ शाब्दीक खडाजंगी झाली. बीएचआर प्रकरणात अटक झालेल्या पाचही संशयित आरोपींना पोलीस कोठडीची मुदत संपल्यानंतर रविवारी पुण्याच्या न्यायालयात हजर करण्यात आले. तेथे सरकारी वकिलांनी आरोपींच्या पोलीस कोठडीसाठी तर बचाव पक्षाच्या वकिलांनी न्यायालयीन कोठडीसाठी युक्तीवाद केला. बचाव पक्षाच्या वकिलांच्या आक्षेपावर ॲड.चव्हाण यांनी सांगितले की, पुण्यातील लोक जळगावला गेले नव्हते. तुम्ही सारसबागेत आला होता. बनावट वेबसाईट बनविणाऱ्याची माहिती मिळाली आहे. महावीर जैन यांची नेमणूक केली नसताना त्याचे मानधन कंडारे याने कसे काय दिले. यामुळे महावीर जैन यांची संपूर्ण कृती संशयास्पद दिसून येते. आरोपींना वाचविण्याचा त्यांचा प्रयत्न दिसतो. स्थानिक गुन्हे शाखेचे तत्कालीन पोलीस निरीक्षक सुनील कुराडे यांच्यासह सर्वांची चौकशी करायची आहे. हा सर्व कटकारस्थानाचा भाग आहे. २ ते ३ व्यक्तींचे जबाब नोंदविण्यात आले आहे. फाॅरेन्सिक ऑडिट आणि ऑडिट यात फरक आहे.
विवेक ठाकरेला किंग बनायला होते
विवेक ठाकरे यांना स्वत:ला किंग बनायचे होते. त्यामुळे यातील इतरांना बाजूला करण्याचा त्यांचा प्रयत्न होता. त्यांनी पुण्यातील सारसबागेत बैठक घेतली. सोसायटी प्रस्तावित असताना त्यावर पैसे जमा केले. बाहेरच्यांच्या पावत्या केल्या. ३० ते ४० जणांच्या तक्रारी आहेत. ॲड. उमेश रघुवंशी यांनी सांगितले की, ठाकरे व कंडारे यांचा काही संबंध नाही. पोलिसांनी त्यांच्या घरातून जप्त केलेली सर्व १२७ प्रकरणे मी स्वत: दिली आहेत. ज्या बैठका घेतल्या. त्यात कोण कोण उपस्थित होते, यांच्या सह्या घेतलेली कागदपत्रेही पोलिसांनी जप्त केली आहे. त्यामुळे त्यांच्याकडे सर्व जणांची यादी आहे. ठेवीदारांच्या वतीने आपण काम पहात होतो. ठेवीदारांना प्रत्येक वेळी जळगाव येणे शक्य नसल्याने त्यांनी त्यांच्या मुळ ठेवपावत्या आपल्याकडे दिल्या होत्या. पोलिसांनी मागील पोलीस कोठडीच्या वेळी जी कारणे दिली आहेत, तीच कारणे यामध्ये पुन्हा दिली आहेत. ठेवीदारांना व्याजासह सर्व पैसे मिळावेत, अशीच आपली भूमिका आहे. ९ ठेवीदारांनी शपथपत्र दिली असून त्यात त्यांनी विवेक ठाकरे यांच्यावर विश्वास व्यक्त केला आहे. आमची कोणतीही फसवणूक झाली नसल्याचे सांगितले. पोलिसांनी जप्त केलेली कागदपत्रे ही माहिती अधिकारात मिळविलेली आहेत. ठेवीदारांसाठी लढा उभारतोय आहे हा गुन्हा आहे का? सामाजिक संस्थेमार्फत पारदर्शक काम करतो असे त्यांनी सांगितले. कमलाकर कोळीचा बचाव मांडताना ॲड. रघुवंशी यांनी सांगितले की, आपण चालक म्हणून कंडारे सांगतील, त्या ठिकाणी घेऊन जाणे हे काम होते. आपण ऑफिसर बेअरर नाही. फक्त चालक होतो. त्यामुळे त्यांनी कोणाबरोबर काय व्यवहार केले याच्याशी आपला काहीही संबंध नाही. दरम्यान, ठेवीदारांच्या वतीने ॲड. मनोज नायक, ॲड, अक्षता नायक यांनी आज न्यायालयात एक अर्ज केला. त्यात ठेवीदारांच्या वतीने आपल्याला बाजू मांडण्यास संधी द्यावी अशी विनंती करण्यात आली आहे.