जळगाव : अपघातग्रस्त रुग्णावर प्राथमिक उपचार करून जिल्हा रुग्णालयात हलविण्याचा सल्ला दिल्याचा राग अनावर होऊन रुग्णासोबत आलेल्या नातेवाइकांनी सहयोग क्रिटिकल केअर सेंटर या रुग्णालयात गोंधळ घालून आयसीयू कक्षाची तोडफोड करून डॉक्टरांवर हल्ला केल्याचा प्रयत्न झाल्याची घटना बुधवारी रात्री १२.३० वाजता घडली. याप्रकरणी शहर पोलीस ठाण्यात पाच जणांविरुद्ध दंगल, बेकायदेशीरपणे प्रवेश करून हल्ला तसेच वैद्यकीय सेवा व्यक्ती आणि वैद्यकीय सेवा संस्था (हिंसक कृत्य व मालमत्तेची हानी किंवा नुकसान प्रतिबंध) अधिनियम २०१० चे कलम ४,६ प्रमाणे गुन्हा दाखल करण्यात आला आहे.
सूत्रांनी दिलेल्या माहितीनुसार, पारोळा तालुक्यातील विटनेर येथील विनोद भीमराव वानखेडे यांचा बुधवारी रात्री चिंचपुरा गावाजवळ अपघात झाला होता. नातेवाईक व काही जवळचे लोक त्यांना घेऊन शाहू नगरातील सहयोग क्रिटिकल केअर सेंटर या रुग्णालयात घेऊन आले. तेथे डॉ. विनोद गोविंदराव किनगे (५४,रा.शाहूनगर) व डॉ. प्रकाश सुरवाडे यांनी तपासून रुग्णावर प्राथमिक उपचार केले. रुग्णाची नाडी लागत नव्हती व बीपीही लागत नव्हता. त्यामुळे डॉ. किनगे यांनी रुग्णाला शासकीय वैद्यकीय महाविद्यालय व रुग्णालयात नेण्याचा सल्ला दिला. त्यामुळे नातेवाइकांनी संताप व्यक्त केला. रुग्णाला खासगी रुग्णवाहिकेतून सरकारी रुग्णालयात नेत असताना काही जण माघारी फिरले व डॉ.किनगे यांच्यावर संताप व्यक्त करून गोंधळ घातला. दुसरीकडे सरकारी रुग्णालयात विनोद वानखेडे यांना मृत घोषित केल्यानंतर संतापात आणखी भर पडली. नातेवाइकांनी आयसीयू कक्षात जाऊन काचा व इतर तोडफोड करून डॉ. किनगे यांची कॉलर पकडून मारहाण करण्याचा प्रयत्न केला. यावेळी ईश्वर महाजन, महेश चव्हाण अशांनी त्यांची सुटका केली.
पोलिसांनी धाव घेतल्याने अनर्थ टळला
सहयाेग क्रिटिकल सेंटरमध्ये तोडफोड होत असल्याची माहिती मिळाल्यानंतर आयएमएचे सचिव डॉ. स्नेहल फेगडे, डॉ.राजेश पाटील व सहकाऱ्यांनी तातडीने घटनास्थळी धाव घेतली. त्यांनी पोलीस अधीक्षक डॉ. प्रवीण मुंडे यांना घटनेची माहिती दिली. शहर पोलीस स्टेशनचे सहायक निरीक्षक गणेश बुवा, भूषण जैतकर, स्थानिक गुन्हे शाखेचे नरेंद्र वारुळे व दिनेश बडगुजर यांनी धाव घेऊन घटनेवर नियंत्रण मिळविले. रुग्णाचा मृत्यू झालेला असल्याने दोन्ही गटाची समजूत घातली, त्यामुळे मोठा अनर्थ टळला. दरम्यान, मध्यरात्री दोन वाजता डॉ. विनोद किनगे यांनी शहर पोलीस ठाण्यात फिर्याद दिली. त्यावरून अज्ञात चार ते पाच जणांविरुद्ध गुन्हा दाखल करण्यात आला आहे.
कोट...
रुग्णाचा मृत्यू झालेला असल्याने हल्ला करणाऱ्यांची नावे निष्पन्न करता आली नाहीत, त्यामुळे कोणाला अटक करता आली नाही. रुग्णासोबत आलेल्या व्यक्ती, तोडफोड करणारे यांची माहिती काढून नावे निष्पन्न केली जातील, त्यानंतर अटकेची कारवाई होईल. सीसीटीव्ही फुटेज तपासून चेहरे स्पष्ट करता येतील.
-गणेश बुवा, सहायक पोलीस निरीक्षक