लोकमत न्यूज नेटवर्क
जळगाव : शासकीय वैद्यकीय महाविद्यालय व रुग्णालयात नवजात शिशु अतिदक्षता विभागात दोन कमी वजनाच्या बाळांना बुधवारी जीवदान मिळाले. वैद्यकीय यंत्रणेच्या प्रयत्नांनी बाळांचा जीव धोक्याबाहेर आल्यानंतर मातांच्या चेहऱ्यावर हसू फुलले होते.
यावल तालुक्यातील फैजपूर येथील रहिवासी असलेले जुबेर खान हे खासगी वाहनचालक आहेत. त्यांच्या बाळाचे (रहेनुमा) वजन जन्मतः १ किलो होते. त्याला श्वास घ्यायला त्रास जाणवत होता. तब्येत खालावत होती. अशा वेळी खासगी दवाखान्यातून बाळाला शासकीय रुग्णालयात उपचारांसाठी २१ डिसेंबर रोजी दाखल करण्यात आले. नवजात शिशु अतिदक्षता विभागात आल्यावर इन्चार्ज डॉ. वृषाली सरोदे यांनी तपासल्यावर लक्षात आले की, त्याच्या फुप्फुसाची वाढ पूर्ण झाली नव्हती. सामान्य वातावरणात जंतुसंसर्ग होऊन जीवाला धोका होता. अशा वेळी तत्काळ अत्याधुनिक उपकरण व यंत्रणेद्वारे बाळ रहेनुमावर उपचार सुरू करण्यात आले.
बाळानेदेखील उपचाराला प्रतिसाद दिला. यावेळी बाळाच्या आई जकियाबी यांना बालशिक्षण देण्यात आले. कांगारू उपचारपद्धती सुरू झाली. यानंतर तब्बल ४३ दिवसांनी २ फेब्रुवारीला बाळाला अधिष्ठाता डॉ. जयप्रकाश रामानंद यांच्या उपस्थितीत डिस्चार्ज देण्यात आला. त्यावेळी बाळाचे वजन १ किलो ३०० ग्राम भरले होते.
वेळीच मिळाले उपचार
तसेच दुसऱ्या घटनेत, शहरातील असोदा रस्त्यावरील बहिणाबाई चौधरी कॉलनीतील रहिवासी योगेश खैरनार यांच्या कन्येलादेखील वजन कमी म्हणजे १ किलो ४०० ग्रॅम होते. त्यामुळे या बाळालादेखील बाहेरील जंतुसंसर्ग होऊ न देता वेळेवर उपचार करण्याची गरज होती. शासकीय रुग्णालयात बाळाची आई अश्विनी यांनादेखील कांगारू मदर केअर उपचार पद्धतीने बालशिक्षण देऊन बाळाला प्रतिजैविके (अँटिबायोटिक) न देता अत्याधुनिक वैद्यकीय यंत्रणेद्वारा उपचार करण्यात आले. या बाळालादेखील २ फेब्रुवारी रोजीच डिस्चार्ज देण्यात आला आहे. डिस्चार्ज वेळी त्याचे वजन १ किलो ६०० ग्राम भरले.