देऊळगाव राजा : शासनाच्या सहाव्या वेतन आयोगातील मार्गदर्शक तत्त्वांची पायमल्ली करून नगरपालिकेच्या काही कर्मचाऱ्यांनी नियमबाह्य वेतनवाढ घेतल्याचा प्रकार समोर आला आहे. या आदेशाची पायमल्ली करून शासनाची दिशाभूल करीत फसवणुकीसाठी जबाबदार अधिकाऱ्यांवर निलंबनाची कारवाई करावी, अशी मागणी चंद्रकांत खरात यांनी नगरपालिका आयुक्तांकडे केली आहे.
जिल्ह्यातील क वर्ग असलेल्या देऊळगाव राजा नगरपालिकेतील काही कर्मचाऱ्यांनी शासनाने जेव्हा सहावा वेतन आयोग लागू केला त्या आयोगाच्या शिफारशीमध्ये कोणत्याही कर्मचाऱ्यांना आगाऊ वेतनवाढ देता येणार नाही, असा निर्णय घेतलेला होता. मात्र, या आदेशाची पायमल्ली करीत अनेक कर्मचाऱ्यांनी चुकीची माहिती नगरपालिका प्रशासनाला देऊन नियमबाह्य वेतनवाढ लागू करून घेत शासनाची फसवणूक केल्याची तक्रार चंद्रकांत ज्ञानदेव खरात यांनी विभागीय आयुक्तांकडे केली आहे. देऊळगाव राजा नगरपालिकेची आर्थिक परिस्थिती हलाखीची असून, उत्पन्नाचे स्रोतही मर्यादित आहेत. असे असताना पालिकेतील काही कर्मचाऱ्यांनी सहाव्या वेतन आयोगाच्या शिफारशीनुसार चुकीची माहिती सादर करून शासनाच्या आदेशाची पायमल्ली केली आहे. त्यामुळे संबंधितांकडून एकरकमी रक्कम वसूल करून प्रशासकीय कारवाई प्रस्तावित करावी तसेच त्यांना साहाय्य करणाऱ्या संबंधित अधिकाऱ्यांची जबाबदारी निश्चित करून त्यांच्यावर निलंबनाची कारवाई करण्याची मागणीही खरात यांनी केली आहे.