अमोल राऊत
तळणी : मंठा तालुक्यातील तळणी येथील प्राथमिक आरोग्य केंद्र सुरू होऊन वर्ष उलटले, तरीही केंद्रात सोईसुविधांचा अभाव आहे. त्यामुळे रुग्णांना गैरसोयीचा सामना करावा लागत आहे. विशेष म्हणजे, आरोग्यमंत्र्यांच्या जिल्ह्यातील आरोग्य केंद्रांना उपचाराची खरी गरज आहे.
तळणी येथे प्राथमिक आरोग्य केंद्र व्हावे, यासाठी माजी आमदार सुरेशकुमार जेथलिया, जिल्हा परिषदेचे माजी उपाध्यक्ष राहुल लोणीकर व तत्कालीन आरोग्य सभापती ए.जे. बोराडे, उद्धव पवार व सुदाम सरकटे यांनी विशेष प्रयत्न केले होते. आ.बबन लोणीकर यांनी वेगाने इमारतींचे काम पूर्ण केले. तळणी येथील प्राथमिक आरोग्य केंद्रांतर्गत बेलोरा, वझर सरकटे, देवठाणा, उस्वद, तळणी, शिरपूर हे सहा उपकेंद्राचा समावेश आहे, तर या केंद्रांतर्गत २५ गावांतील नागरिकांना आरोग्याची सेवा दिली जाते. सध्या या रुग्णालयात पिण्याचे शुद्ध पाणी उपलब्ध नाही, विविध मशनरी, फर्निचर नाही. विशेषत: रुग्णांसाठी महत्त्वाची असलेली १०८ रुग्णवाहिका नाही. आणीबाणीच्या वेळी इतर ठिकाणची रुग्णवाहिका किंवा खासगी वाहनांचा आधार रुग्णांना घ्यावा लागत आहे. प्रसूतीची सुविधा नाही, कर्मचाऱ्यांना बसायला खुर्च्या व फर्निचर नाही, पुरेसे मेडिसिन उपलब्ध नाही, बरेचसे कर्मचारी अतिरिक्त जबाबदारीवर काम करीत आहेत. या आरोग्य केंद्रामध्ये २ वैद्यकीय अधिकारी, १ जीएनएम, २ आरोग्यसेविका, ४ आरोग्यसेवक, १ औषधी निर्माता, १ सुपरवायझर व २ शिपाई असणे गरजेचे आहे. एकूणच सोईसुविधांचा अभाव आणि कर्मचाऱ्यांची अपुरी संख्या, यामुळे या केंद्रातील कामकाज विस्कळीत झाले असून, रुग्णासह नातेवाइकांना गैरसोयीचा सामना करावा लागत आहे. तळणीचे प्राथमिक आरोग्य केंद्र ऑनलाइन नाही. दहिफळ खंदारे व बैलोरा येथील आरोग्य केंद्रातून औषधी आणून तात्पुरती सेवा दिली जात असल्याचा आरोप शिवसेनेचे तालुका उपप्रमुख ज्ञानेश्वर माउली सरकटे यांनी केला.
तळणी येथील प्राथमिक आरोग्य केंद्रातील गैरसोयी दूर करण्याच्या दृष्टिकोनातून आरोग्यमंत्री राजेश टोपे यांना या संदर्भात बोलून अपेक्षित सोईसुविधा उपलब्ध करून देण्यासंबधी प्रयत्न करू, असे शिवसेनेचे जिल्हाप्रमुख ए.जे. बोराडे यांनी सांगितले.
तळणी येथील प्राथमिक आरोग्य केंद्रात अपेक्षित सोईसुविधांचा अभाव असला, तरी येणाऱ्या रुग्णांना सेवा दिली जात असल्याचे तळणीचे वैद्यकीय अधिकारी डाॅ.सुनील मगर यांनी सांगितले.