धक्कादायक! जालन्यात रेडीमेड कपड्यांच्या दुकानातून २१ तलवारी जप्त, व्यापारी अटकेत

महावीर चौकातील कपड्याच्या दुकानात पोलिसांची धाड; २१ धारदार तलवारींसह व्यापाऱ्याला अटक

जालना: शहरातील गजबजलेल्या महावीर चौक परिसरात एका रेडीमेड कपड्याच्या दुकानातून पोलिसांनी तब्बल २१ धारदार तलवारी जप्त केल्या आहेत. सदर बाजार पोलिसांनी गुरुवारी दुपारी एक वाजेच्या सुमारास ही धाड टाकली. या कारवाईने व्यापारी वर्तुळात आणि शहरात मोठी खळबळ उडाली आहे.

गुप्त माहितीने फुटले भांडं
महावीर चौकातील 'जय माता दी मेन्स वेअर' या दुकानात अवैधरीत्या शस्त्रांचा साठा असल्याची गोपनीय माहिती पोलीस निरीक्षक संदीप भारती यांना मिळाली होती. या माहितीच्या आधारे डीबी पथकाने तात्काळ कारवाईचे नियोजन केले. पोलीस उपनिरीक्षक सचिन सानप यांनी पथकासह दुकानात छापा टाकला असता, तिसऱ्या मजल्यावर तलवारींचे घबाड हाती लागले.

२१ तलवारी जप्त, व्यापारी ताब्यात
दुकानाची झडती घेतली असता, पोलिसांना १३ मोठ्या आणि ८ लहान अशा एकूण २१ स्टीलच्या धारदार तलवारी आढळून आल्या. या तलवारींच्या मालकीबाबत दुकानदार मनीष दिलीप निहलानी (वय ४३, रा. अजिंठा नगर) याच्याकडे परवान्याची विचारणा केली असता, त्याच्याकडे कोणताही अधिकृत परवाना नसल्याचे निष्पन्न झाले. पोलिसांनी सुमारे २५,९०० रुपये किमतीच्या या तलवारी जप्त केल्या असून आरोपीला ताब्यात घेतले आहे.

यांनी केली कारवाई
पोलीस अधीक्षक अजयकुमार बन्सल, अपर पोलीस अधीक्षक आयुष नोपाणी आणि डीवायएसपी अनंत कुलकर्णी यांच्या मार्गदर्शनाखाली पोनि. संदीप भारती, सपोनि सचिन सानप आणि त्यांच्या पथकाने ही कारवाई यशस्वी केली. आरोपीविरुद्ध सदर बाजार पोलीस ठाण्यात गुन्हा दाखल करण्यात आला असून, या तलवारी कशासाठी आणि कुठून आणल्या होत्या, याचा तपास पोलीस करत आहेत.