Jalana: फेरफार नोंद घेण्यासाठी ३ हजारांची लाच स्वीकारताना तलाठ्यास रंगेहात पकडले

याप्रकरणी जालना तालुका पोलिस ठाण्यात गुन्हा दाखल करण्याची प्रक्रिया सुरू होती.

जालना : वडिलांच्या मृत्यूनंतर शेतीची वारसा हक्काने फेरफार नोंद घेण्यासाठी ५ हजार रुपयांची लाच मागणाऱ्या सिंधी काळेगाव येथील तलाठ्याला लाचलुचपत प्रतिबंधक विभागाने बुधवारी रंगेहात पकडले. गजानन मनसाराम बारवाल (वय ३६) असे लाच स्वीकारणाऱ्या ग्राम महसूल अधिकाऱ्याचे नाव आहे.

४२ वर्षीय तक्रारदाराच्या वडिलांचे निधन झाले होते. त्यांच्या नावे असलेली वडिलोपार्जित शेती वारसा हक्काने नावावर करण्यासाठी आणि फेरफार नोंद घेऊन फाईल मंडळ अधिकाऱ्यांकडे पाठवण्यासाठी तक्रारदाराने २७ जानेवारी रोजी कागदपत्रे सादर केली होती. मात्र, हे काम करण्यासाठी तलाठी गजानन बारवाल याने ५ हजार रुपयांच्या लाचेची मागणी केली. तक्रारदाराला लाचेची रक्कम देण्याची इच्छा नसल्याने त्यांनी छत्रपती संभाजीनगर येथील लाचलुचपत प्रतिबंधक विभागाकडे धाव घेऊन तक्रार नोंदवली. या तक्रारीची खातरजमा करण्यासाठी २८ जानेवारी रोजी पंचासमक्ष पडताळणी करण्यात आली. यावेळी बारवाल याने तडजोडीअंती ३ हजार रुपये स्वीकारण्याचे मान्य केले. 

जालना येथील रूपनगर भागात गाळा भाड्याने घेऊन तिथे तलाठी सज्जा कार्यालय सुरू केले होते. या कार्यालयासमोर असलेल्या रोडवर बुधवारी सापळा रचण्यात आला. तक्रारदाराकडून ३ हजार रुपयांची लाच स्वीकारताच दबा धरून बसलेल्या एसीबीच्या पथकाने बारवाल याला पंचासमक्ष ताब्यात घेतले. आरोपीच्या अंगझडतीमध्ये लाचेचे ३ हजार रुपये, वैयक्तिक खर्चाचे ३ हजार १२० रुपये आणि एक वन-प्लस कंपनीचा मोबाइल जप्त करण्यात आला आहे.

सध्या आरोपीच्या घराची झडती घेण्याची प्रक्रिया सुरू असून, याप्रकरणी जालना तालुका पोलिस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती. ही कारवाई छत्रपती संभाजीनगर येथील लाचलुचपत प्रतिबंधक विभागाच्या पथकाचे पोलिस निरीक्षक शांतीलाल चव्हाण यांच्या नेतृत्वात करण्यात आली.