युद्धाचा 'THE END' होणार? ट्रम्प यांचा मोठा यूटर्न! आधी इराण उद्ध्वस्त करण्याची शपथ, आता 'होर्मुज'बाबत मोठी माघार; काय आहे नवा प्लॅन?

अधिकाऱ्यांच्या म्हणण्यानुसार, ट्रम्प यांच्याकडे लष्करी पर्याय उपलब्ध आहेत, मात्र ते सध्या त्यांच्या प्राधान्यक्रमात नाहीत... यापूर्वी, त्यांनी इराणला इशारा दिला होता की, जर त्यांनी होर्मुझची सामुद्रधुनी पुन्हा खुली केली नाही, तर त्यांना गंभीर परिणाम भोगावे लागतील...

अमेरिका-इस्रायल आणि इराण यांच्यातील युद्धाला एक महिना उलटून गेला आहे. मात्र आता अमेरिकेचे राष्ट्राध्यक्ष डोनाल्ट ट्रम्प इराणसोबतचेयुद्ध फार अधिक खेचण्याच्या मन:स्थितीत दिसत नाहीत. 'होर्मुज सामुद्रधुनी' (Strait of Hormuz) पुन्हा खुली करण्याशिवायही युद्ध संपवण्याची तयारी त्यांनी आपल्या सहकाऱ्यांकडे बोलून दाखवल्याचे समजते. जर हा जलमार्ग जबरदस्तीने खुला करण्यासाठी थेट लष्करी कारवाई केली, तर युद्ध नियोजित वेळेपेक्षा ४ ते ६ आठवडे अधिक लांबू शकते, असे ट्रम्प प्रशासनाला वाटते. होर्मुज स्ट्रेट खुला करण्यासाठी US नंतरही स्वतंत्रपणे ऑपरेशन आखू शकतो.

'वॉल स्ट्रीट जर्नल'ने दिलेल्या वृत्तानुसार, "अमेरिकेचे मुख्य लक्ष आता इराणचे नौदल आणि क्षेपणास्त्र साठा कमकुवत करून युद्ध थांबवण्यावर असेल. महत्त्वाच्या जलमार्गावरील व्यापार कुठल्याही अडथळ्याशिवाय सुरू रहावा यासाठी इराणवर दबाव आणायला हवा. हा प्रयत्न अयशस्वी ठरल्यास, वाशिंग्टन युरोप आणि आखाती देशांमधील आपल्या मित्रराष्ट्रांवर होर्मुजचा मार्ग मोकळा करण्यासाठी दबाव वाढवेल. 

अधिकाऱ्यांच्या म्हणण्यानुसार, ट्रम्प यांच्याकडे लष्करी पर्याय उपलब्ध आहेत, मात्र ते सध्या त्यांच्या प्राधान्यक्रमात नाहीत. युद्धाच्या सुरुवातीपासून, ट्रम्प यांनी होर्मुझच्या सामुद्रधुनी संदर्भात अनेक परस्परविरोधी विधाने केली आहेत. यापूर्वी, त्यांनी इराणला इशारा दिला होता की, जर त्यांनी होर्मुझची सामुद्रधुनी पुन्हा खुली केली नाही, तर त्यांना गंभीर परिणाम भोगावे लागतील.

ट्रम्प यांनी, अलीकडेच सोशल मीडियावर पोस्ट करत, "इराणच्या सरकारशी आपली चर्चा सुरू आहे. मात्र, लवकरात लवकर कुठल्याही प्रकारची सहमती झाली नाही आणि होर्मुजचा मार्ग खुला केला गेला नाही, तर इराणच्या तेल विहिरी उडवून देण्याचा इशाराही त्यांनी दिला. एवढेच नाही तर, इराणचे वीज प्रकल्प, लष्करी तळ आणि खारे पाणी गोड करणारे 'डीसॅलिनेशन प्लांट' देखील लक्ष्य केले जातील, अशी धमकीही ट्रम्प यांनी दिली आहे.