रशियाने इराणला का मदत केली नाही? राष्ट्राध्यक्ष व्लादिमीर पुतिन यांनी सांगितले कारण! म्हणाले...

रशियाने इराणला उघडपणे पाठिंबा का दिला नाही, हा प्रश्न अनेकांना पडला होता. रशियाचे राष्ट्राध्यक्ष व्लादिमीर पुतिन यांनी यावर आता स्पष्टीकरण दिले आहे.

मध्य पूर्वेतील तणाव दिवसेंदिवस वाढत असताना, इराण आणि इस्रायल यांच्यातील संघर्षात अमेरिकाही सहभागी झाली आहे. अशा परिस्थितीत, रशियानेइराणला उघडपणे पाठिंबा का दिला नाही, हा प्रश्न अनेकांना पडला होता. रशियाचे राष्ट्राध्यक्ष व्लादिमीर पुतिन यांनी यावर आता स्पष्टीकरण दिले आहे.

पुतिन यांच्या तटस्थ भूमिकेमागील कारण
पुतिन यांच्या मते, रशिया या संघर्षात थेट सहभागी होऊ शकत नाही. यामागे इस्रायलमध्ये राहणारे मोठ्या संख्येने रशियन भाषिक लोक आहेत, ज्यांचे जीवन धोक्यात येऊ शकते. सेंट पीटर्सबर्ग येथील आंतरराष्ट्रीय आर्थिक मंचावर पुतिन म्हणाले की, "मी तुम्हाला सर्वांना सांगू इच्छितो की, सोव्हिएत युनियन आणि रशियामधून आलेले २० लाखांहून अधिक लोक इस्रायलमध्ये राहतात. आज तो एक रशियन भाषिक देश आहे आणि कोणताही निर्णय घेण्यापूर्वी आपल्याला ही वस्तुस्थिती लक्षात घ्यावी लागेल यात शंका नाही."

हेच मुख्य कारण आहे की, इराण आणि रशियाचे दशकांपासूनचे जुने आणि मजबूत संबंध असूनही, पुतिन सध्या तटस्थ भूमिका घेण्याचा प्रयत्न करत आहेत. इस्रायलमध्ये रशियन वंशाची मोठी लोकसंख्या असल्याने, इराणला उघडपणे पाठिंबा देणे रशियासाठी अडचणीचे ठरू शकते.

रशिया आणि इराणचे संबंध अजूनही मजबूत
इराणला थेट पाठिंबा न दिल्याने रशिया-इराण संबंधांवर परिणाम होईल का, असा प्रश्न अनेकांना पडला असेल. यावर पुतिन यांनी स्पष्ट केले की, रशियाचे केवळ अरब देशांशीच नव्हे, तर सर्व इस्लामिक देशांशीही चांगले संबंध आहेत. रशियाच्या लोकसंख्येपैकी १५ टक्के लोक मुस्लिम आहेत आणि रशिया इस्लामिक सहकार्य संघटनाचा सदस्य आहे. त्यामुळे, रशिया आणि इराणमधील मैत्रीवर शंका घेण्याचा प्रश्नच उद्भवत नाही, असे पुतिन यांनी ठामपणे सांगितले.

मध्य पूर्वेतील वाढता तणाव
अमेरिकेने इराणच्या फोर्डो, नतान्झ आणि इस्फहान येथील तीन अणु तळांवर बॉम्बहल्ला केल्यानंतर पुतिन यांचे हे विधान आले आहे. या हल्ल्यानंतर इराणही सातत्याने इस्रायली शहरांना लक्ष्य करत आहे, ज्यामुळे या क्षेत्रातील परिस्थिती अधिकच गंभीर बनली आहे.