आम्हाला माहितीय खामेनेई कुठे लपलेत! इराणच्या 'सुप्रीम लीडर'ला ट्रम्प यांच्याकडून अल्टीमेटम

अमेरिकेचे राष्ट्राध्यक्ष डोनाल्ड ट्रम्प यांनी इराणचे सर्वोच्च नेते अयातुल्ला अली खामेनेई यांच्याबद्दल एक मोठं विधान केलं आहे. ट्रम्प यांनी खामेनेई यांचं नाव थेट न घेता, 'सुप्रीम लीडर' असा उल्लेख करत एक महत्त्वपूर्ण पोस्ट केली आहे.

इराण आणि इस्रायल यांच्यातील संघर्ष दिवसेंदिवस वाढत चालला आहे. याच दरम्यान, अमेरिकेचे राष्ट्राध्यक्ष डोनाल्ड ट्रम्प यांनी इराणचे सर्वोच्च नेते अयातुल्ला अली खामेनेई यांच्याबद्दल एक मोठं विधान केलं आहे. ट्रम्प यांनी खामेनेई यांचं नाव थेट न घेता, 'सुप्रीम लीडर' असा उल्लेख करत एक महत्त्वपूर्ण पोस्ट केली आहे.

ट्रम्प काय म्हणाले?

आपल्या पोस्टमध्ये ट्रम्प म्हणाले की, "तथाकथित 'सुप्रीम लीडर' कुठे लपले आहेत हे आम्हाला चांगलंच माहीत आहे. त्यांना सहज लक्ष्य करता येऊ शकतं, पण ते सध्या सुरक्षित आहेत. पण, आम्ही त्यांना मारणार नाही, किमान आता तरी नाही." मात्र, या विधानासोबतच त्यांनी इराणला कडक शब्दांत इशाराही दिला. "आम्हाला नागरिकांवर किंवा अमेरिकन सैनिकांवर क्षेपणास्त्रे डागायची नाहीत. आमचा संयम आता संपत चालला आहे," असं ट्रम्प यांनी बजावलं.

इराणने क्षेपणास्त्रे डागली, इस्रायलचा प्रत्युत्तर

ट्रम्प यांच्या इशाऱ्यानंतर, इस्रायलने लगेचच अलर्ट जारी केला आहे की, इराणने त्यांच्यावर क्षेपणास्त्रे डागली आहेत. ही क्षेपणास्त्रे जॉर्डन, लेबनॉन आणि सीरियामार्गे इस्रायलच्या दिशेने येत असल्याचं सांगितलं जात आहे. 'द टाइम्स ऑफ इस्रायल'च्या वृत्तानुसार, इस्रायल डिफेन्स फोर्स (IDF) ने दावा केला आहे की, त्यांनी इराणमधील ७० पेक्षा जास्त एअर डिफेन्स सिस्टम आतापर्यंत उद्ध्वस्त केल्या आहेत.

आयडीएफनुसार, इस्रायली हवाई दलाने इराणमधील कारवाई सुरू केल्यापासून ७० हवाई संरक्षण प्रणाली नष्ट केल्या आहेत. शुक्रवार (७ जून) सकाळच्या कारवाईच्या पहिल्या २४ तासांत ४० हून अधिक इराणी हवाई संरक्षण प्रणालींवर हल्ला करण्यात आला होता, तर त्यानंतर आणखी ३० प्रणालींना लक्ष्य करण्यात आलं.

अमेरिकेच्या उपराष्ट्रपतींचाही इशारा

इस्रायल-इराण युद्धाबद्दल अमेरिकेचे उपराष्ट्रपती जे.डी. वेंस यांनीही एक मोठं विधान केलं आहे. ते म्हणाले की, "ट्रम्प इराणविरुद्ध पुढील कारवाईचा निर्णय घेऊ शकतात. ट्रम्प नेहमीच सांगत आले आहेत की, इराण युरेनियम समृद्ध करू शकत नाही आणि त्यांनी वारंवार म्हटलं आहे की हे दोनपैकी एका मार्गाने होईल - सोप्या मार्गाने किंवा दुसऱ्या मार्गाने." वेंस यांनी स्पष्ट केलं की, "इराणच्या युरेनियम संवर्धनाला थांबवण्यासाठी ट्रम्प यांना पुढील कारवाई करण्याची गरज आहे का, याचा निर्णय ते घेऊ शकतात. हा निर्णय राष्ट्रपतींचा असेल."