इराणच्या समुद्रात युद्धाचा भडका! भारत सरकारकडून भारतीयांना इमर्जन्सी अलर्ट; "कुठेही जाण्यापूर्वी आम्हाला सांगा..."

इराण-इस्रायल तणावाच्या पार्श्वभूमीवर भारताने भारतीय नाविक आणि नागरिकांसाठी सुरक्षा नियमावली जारी केली आहे.

इस्रायल आणि इराणमधील संघर्ष आता टोकाला पोहोचला असून त्याचे पडसाद थेट समुद्रात उमटू लागले आहेत. इस्रायलने लेबनॉनवर केलेल्या भीषण हल्ल्याला प्रत्युत्तर म्हणून इराणने जागतिक तेल व्यापाराची नाडी मानली जाणारी होर्मुझ सामुद्रधुनी रोखून धरली आहे. या युद्धजन्य परिस्थितीमुळे भारतीय नाविक आणि जहाजांना मोठा धोका निर्माण झाला असून, भारत सरकारच्या 'शिपिंग डायरेक्टरेट जनरल'ने तातडीची सुरक्षा नियमावली जारी केली आहे.

नाविकांसाठी कडक सूचना "घरातच राहा..."

समुद्रात आणि किनाऱ्यावर असलेल्या भारतीय नागरिकांसाठी सरकारने विशेष सूचना दिल्या आहेत, जे भारतीय सध्या इराण किंवा आसपासच्या बंदरांवर आहेत, त्यांनी शक्यतो घराबाहेर पडू नये. संवेदनशील भागांपासून दूर राहावे आणि कुठेही प्रवास करण्यापूर्वी भारतीय दूतावासाशी संपर्क साधावा. जहाजांवर असलेल्या खलाशांनी अत्यंत आवश्यक कामाशिवाय किनाऱ्यावर उतरू नये, अशा सूचना देण्यात आल्या आहेत.

सर्व भारतीयांना सरकारी अपडेट्सवर नजर ठेवण्यास आणि कंपनीच्या प्रतिनिधींशी सतत संपर्कात राहण्यास सांगण्यात आले आहे. कोणत्याही आपत्कालीन परिस्थितीत विशेष हेल्पलाइन क्रमांकावर संपर्क करण्याचे आवाहन करण्यात आले आहे.

होर्मुझमध्ये अडकलीये जगाची रसद

इराणने होर्मुझ सामुद्रधुनीतून तेल टँकर्सच्या वाहतुकीवर बंदी घातली आहे. हिजबुल्लाहने देखील इशारा दिला आहे की, जर लेबनॉनला युद्धविराम करारात समाविष्ट केले नाही, तर हा करार मोडीत निघेल. यामुळे आखाती देशांतून होणारा तेलपुरवठा विस्कळीत होण्याची चिन्हे आहेत.

भारतीय नौदलाचा वॉच

युद्धाच्या सुरुवातीला या परिसरात भारताची २५ जहाजे होती, त्यापैकी ९ जहाजांनी सुरक्षितपणे होर्मुझ ओलांडले आहे. भारतीय नौदल गुरुग्राम येथील 'इन्फॉर्मेशन फ्युजन सेंटर'च्या माध्यमातून या परिसरातील प्रत्येक हालचालीवर लक्ष ठेवून आहे. हे केंद्र २८ देशांशी जोडलेले असून, जहाजांवरील हल्ल्यांची रिअल-टाइम माहिती मिळवण्यासाठी नौदल पूर्णपणे सज्ज आहे.