US- Iran War: अमेरिका- इराण यांच्यातील युद्ध अटळ? हल्ल्याची तारीखही ठरली? महत्त्वाची अपडेट समोर!

US-Iran war Imminent: अणुकरार अपयशी ठरल्यानंतर आता मध्यपूर्वेत युद्धाचे ढग दाटले आहेत. अमेरिकेने २४ तासांत ५० हून अधिक लढाऊ विमाने आशियात तैनात केली असून, कोणत्याही क्षणी हल्ल्याची शक्यता आहे.

अणुकरार निष्फळ ठरल्यानंतर आता अमेरिका आणि इराणमधील तणाव शिगेला पोहोचला आहे. अमेरिकेने गेल्या २४ तासांत ५० हून अधिक अत्याधुनिक लढाऊ विमाने आशियाई क्षेत्रात तैनात केली असून, कोणत्याही क्षणी युद्धाची घोषणा होण्याची शक्यता वर्तवण्यात येत आहे. अमेरिकन वृत्तसंस्था अ‍ॅक्सिओसने प्रसिद्ध केलेल्या अहवालानुसार, अमेरिका आणि इराण यांच्यातील युद्ध अनेक आठवडे सुरू राहण्याची शक्यता आहे. 

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

व्हाईट हाऊसच्या एका अधिकाऱ्याने दावा केला आहे की, अमेरिका येत्या काही दिवसांत इराणवर हल्ला करण्याची शक्यता ९० टक्क्यांपर्यंत पोहोचली आहे. राजनैतिक चर्चांचे मार्ग आता संपुष्टात आल्याचे दिसत असून, अमेरिकेचे राष्ट्राध्यक्ष आपल्या भूमिकेवर ठाम आहेत. पेंटागॉनमधील काही अधिकाऱ्यांमध्ये या कारवाईच्या उद्दिष्टांबाबत मतभेद असले, तरी लष्करी हालचालींनी वेग आला आहे. दरम्यान, इस्रायलने आपल्या सैन्याला हाय अलर्टवर ठेवले असून कोणत्याही परिस्थितीत युद्धाला सामोरे जाण्याची तयारी दर्शवली आहे.

अहवालांनुसार, अमेरिकेने मध्य पूर्वेत आपली लष्करी ताकद वाढवली आहे. सध्या मध्य पूर्वेत दोन विमानवाहू जहाजे, १२ युद्धनौका, शेकडो लढाऊ विमाने आणि असंख्य हवाई संरक्षण प्रणाली तैनात आहेत. गेल्या काही दिवसांत १५० हून अधिक अमेरिकन लष्करी मालवाहू विमानांनी मध्य पूर्वेत शस्त्रे आणि दारूगोळा पोहोचवण्यासाठी उड्डाण केली आहे. अमेरिकेने गेल्या २४ तासांत मध्य पूर्वेत आपली लष्करी तैनाती आणखी तीव्र केली आहे, एफ-३५ एस, एफ-२२ सह आणि एफ-१६ सह ५० हून अधिक लढाऊ विमाने मध्य पूर्वेत उड्डाण करत आहेत.

सीबीएस न्यूजच्या वृत्तानुसार, अमेरिकेचे राष्ट्राध्यक्ष डोनाल्ड ट्रम्प यांना त्यांच्या वरिष्ठ राष्ट्रीय सुरक्षा सल्लागारांनी सांगितले आहे की, अमेरिकेचे सैन्य शनिवारी इराणवर हल्ला करू शकते. मात्र, त्यांनी अद्याप हल्ल्याला परवानगी द्यायची की नाही, याचा निर्णय घेतलेला नाही. असाही दावा केला जात आहे की, अमेरिकन प्रशासन या आठवड्याच्या शेवटी निर्णय घेण्याची शक्यता आहे.