थरार...! तब्बल ३० मीटरपर्यंत विमानासारखा हवेत उडून थेट घरात शिरला भरधाव ट्रक, थोडक्यात बचावलं संपूर्ण कुटुंब; बघा VIDEO

स्थानिक माध्यमांशी बोलताना ब्रुडनोक म्हणाले, "एखादा ट्रक असा उडत येईल याचा मी कधी विचारही केला नव्हता. अचानक मोठा स्फोट झाला आणि घर हादरले. खाली जाऊन पाहिले तर घराचा समोरचा संपूर्ण भाग उद्ध्वस्त झाला होता."

अमेरिकेतील टायगार्ड येथून एका अत्यंत थरारक अपघाताचा व्हिडिओ समोर आला आहे. यात, एक भरधाव ट्रक मातीच्या ढिगाऱ्यावरून उसळून, तब्बल ३० मीटरपर्यंत विमानासारखा हवेत उडत जाऊन थेट एका घरात शिरल्याचे दिसत आहे. सुदैवाने या अपघातातून संबंधित कुटुंब थोडक्यात बचावले आहे.

अपघाताचा थरार -
हा अपघात गेल्या शुक्रवारी पहाटे ३ वाजण्याच्या सुमारास घडला. स्थानिक पोलिसांनी दिलेल्या माहितीनुसार, हा ट्रक 'साउथवेस्ट स्कोल्स फेरी रोड'वरून पश्चिमेकडे जात होता. चालक अत्यंत बेजबाबदारपणे आणि वेगाने ट्रक चालवत होता. या संपूर्ण अपघाताचे फुटेज घराच्या दरवाजावर बसवलेल्या कॅमेऱ्यात कैद झाले आहे. यात, ट्रक आधी एका मातीच्या ढिगाऱ्यावरून उडाला आणि एका रिटेनिंग वॉलला पार करत थेट घराच्या भिंतीवर जाऊन धडकल्याचे स्पष्टपणे दिसत आहे.

थेट बाथरूममध्ये शिरला ट्रक -
हा ट्रक डेव्हिड ब्रुडनोक यांच्या घराच्या तळमजल्यावरील बाथरूममध्ये शिरला. स्थानिक माध्यमांशी बोलताना ब्रुडनोक म्हणाले, "एखादा ट्रक असा उडत येईल याचा मी कधी विचारही केला नव्हता. अचानक मोठा स्फोट झाला आणि घर हादरले. खाली जाऊन पाहिले तर घराचा समोरचा संपूर्ण भाग उद्ध्वस्त झाला होता." सुदैवाने, अपघाता वेळी ब्रुडनोक, त्यांची पत्नी आणि तीन लहान मुले वरच्या मजल्यावर होते. यामुळे कुणालाही दुखापत झाली नाही.

Truck soars through air, crashes into Oregon home

A doorbell camera captured a truck soaring through the air and into an Oregon home.

The truck flew through the front door of the house, located in Tigard, early on Friday morning. The house has since been deemed unlivable, and… pic.twitter.com/jzfV27twhX

— The World Watch (@WorldWatchGoat) February 18, 2026

चालकावर गुन्हा दाखल -
अपघातानंतर चालक स्वतःहून गाडीबाहेर आला, तर अग्निशमन दलाच्या पथकाने ढिगाऱ्यात अडकलेल्या प्रवाशाला बाहेर काढले. दोघांनाही किरकोळ दुखापत झाली आहे. पोलिसांनी ३३ वर्षीय चालक जॅकब हँकिन्स विरोधात निष्काळजीपणाने गाडी चालवणे आणि इतरांचा जीव धोक्यात टाकल्याप्रकरणी गुन्हा दाखल केला आहे. पोलीस अपघातासंदर्भात अधिक तपास करत आहेत.