पुन्हा युद्ध पेटणार? रशिया-युक्रेन शांतता चर्चा थांबली; झेलेन्स्कींचा पुतिन-ट्रम्प यांच्यावर आरोप...

Russia-Ukraine : डोनाल्ड ट्रम्प यांच्या भूमिकेवर झेलेन्स्कींची नाराजी!

Russia-Ukraine : स्वित्झर्लंडच्या जिनिव्हा येथे बुधवारी रशिया आणि युक्रेन यांच्यात सुरू असलेल्या शांतता चर्चा अचानक संपुष्टात आल्या. युक्रेनचे राष्ट्राध्यक्ष वोलोदिमीर झेलेन्स्की यांनी या चर्चांना अत्यंत कठीण आणि तणावपूर्ण असल्याचे सांगत रशियाचे अध्यक्ष व्लादिमीर पुतिन यांच्यासह अमेरिकेचे अध्यक्ष डोनाल्ड ट्रम्प यांनाही जबाबदार धरले आहे. झेलेन्स्की यांनी आरोप केला की, रशिया चार वर्षांपासून सुरू असलेल्या युद्धाचा शेवट करण्याच्या प्रक्रियेला जाणीवपूर्वक विलंब लावत आहे. 

चर्चा अचानक थांबली...

झेलेन्स्कींच्या या वक्तव्यानंतर काही वेळातच रशियाची सरकारी वृत्तसंस्था RIA ने शांतता चर्चा संपल्याची माहिती दिली. रशियाचे मीडिया प्रमुख व्लादिमीर मेडिंस्की यांनी पुढील चर्चा लवकरच होतील, असे सांगितले; मात्र कोणतीही निश्चित तारीख जाहीर केली नाही. दरम्यान, एका युक्रेनी अधिकाऱ्यानेही पुष्टी केली की, जिनिव्हामधील ही बैठक सुमारे दोन तास चालली. मात्र, चर्चा पुढे जाऊ शकली नाही.

ट्रम्प यांच्या भूमिकेवर झेलेन्स्कींची नाराजी

यापूर्वी एका अमेरिकन वेबसाईटला दिलेल्या मुलाखतीत झेलेन्स्की यांनी स्पष्ट शब्दांत सांगितले की, फक्त युक्रेनकडूनच तडजोडीची अपेक्षा व्यक्त करणे योग्य नाही. रशियालाही तेवढीच जबाबदारी घ्यावी लागेल. जर कोणत्याही शांतता योजनेत युक्रेनला पूर्व डोनबासमधील ते प्रदेश सोडण्यास सांगितले गेले, जे रशियाने अद्याप ताब्यात घेतलेले नाहीत, तर युक्रेनची जनता अशा प्रस्तावाला जनमतसंग्रहात नाकारेल. 

चार वर्षांपासून युद्ध सुरू...

ही चर्चा रशियाच्या २०२२ मधील युक्रेनवरील आक्रमणाच्या चौथ्या वर्धापनदिनाच्या काही दिवस आधी झाली. चार वर्षांपासून सुरू अशलेल्या युद्धात आतापर्यंत लाखो लोक मृत किंवा जखमी झाले आहेत, तर कोट्यवधी नागरिक विस्थापित झाले आहेत. रशियाच्या हल्ल्यात युक्रेनमधील अनेक शहरे, गावे आणि पायाभूत सुविधा उद्ध्वस्त झाल्या आहेत. तसेच, युक्रेनच्या सुमारे २०% भूभागावर रशियाचा ताबा आला आहे.