रशिया आणि युक्रेनमधील संघर्षाने आधीच धुमसत असलेल्या क्रिमिया परिसरातून एक अत्यंत धक्कादायक आणि भीषण बातमी समोर आली आहे. रशियाचे ‘An-26’ हे लष्करी मालवाहू विमान बुधवारी सकाळी एका उंच पहाडाला धडकून भीषण अपघाताचा बळी ठरले. या काळजाचा थरकाप उडवणाऱ्या दुर्घटनेत विमानातील सर्व २९ जणांचा जागीच मृत्यू झाला आहे. यामध्ये रशियन लष्कराचे अधिकारी आणि कर्मचाऱ्यांचा समावेश असल्याचे समजते.
नेमकं काय घडलं?
मिळालेल्या माहितीनुसार, रशियन हवाई दलाचे An-26 हे विमान बुधवारी सकाळी आपले नियमित उड्डाण करत होते. मात्र, काळ्या समुद्राच्या किनारपट्टीवर असलेल्या क्रिमिया द्वीपकल्पावर पोहोचल्यानंतर विमानाचा नियंत्रण कक्षाशी असलेला संपर्क अचानक तुटला. काही वेळातच हे विमान एका दुर्गम डोंगराळ भागातील कडेवर जाऊन आदळले. हा अपघात इतका भीषण होता की, धडक बसताच विमानाचे तुकडे झाले आणि विमानाने पेट घेतला. रशियन वृत्तसंस्था 'तास'ने दिलेल्या माहितीनुसार, शोध पथकाला विमानाचा ढिगारा सापडला असून, हा अपघात इतका भीषण होता की दुर्घटनेत कुणीही जिवंत वाचण्याची शक्यता उरलेली नाही.
२३ प्रवासी अन् ६ क्रू मेंबर्सचा मृत्यू
रशियाच्या संरक्षण मंत्रालयाने या दुर्घटनेला दुजोरा दिला आहे. विमानात एकूण २९ जण स्वार होते, ज्यामध्ये २३ प्रवासी आणि ६ क्रू मेंबर्सचा समावेश होता. या सर्वांचा मृत्यू झाल्याचे स्पष्ट करण्यात आले आहे. प्राथमिक अंदाजानुसार, खराब हवामान किंवा विमानातील तांत्रिक बिघाडामुळे वैमानिकाचे नियंत्रण सुटले असावे आणि विमान थेट डोंगराच्या कड्यावर आदळले असावे, अशी शक्यता वर्तवण्यात आली आहे.
सुरक्षेचा प्रश्न ऐरणीवर
२०१४ मध्ये रशियाने युक्रेनकडून क्रिमियाचा ताबा घेतल्यापासून हा भाग लष्करीदृष्ट्या अत्यंत संवेदनशील मानला जातो. अशा तणावपूर्ण वातावरणात लष्करी विमानाचा अपघात झाल्याने रशियन लष्कराच्या हवाई मोहिमांच्या सुरक्षेवर मोठे प्रश्नचिन्ह उभे राहिले आहे. An-26 हे सोव्हिएत काळातील जुन्या बनावटीचे विमान आहे. रशियाने १९७२ मध्ये हे विमान सेवेत दाखल केले होते. जुन्या तंत्रज्ञानामुळेच हा घात झाला का, याचा तपास आता रशियन तज्ज्ञांकडून केला जात आहे.