२० वर्षीय पाकिस्तानी युवकाच्या 'प्लॅनिंग'नं अमेरिका हादरली; FBI नं अटक करताच मोठा खुलासा

FBI ला जेव्हा त्यांच्या गुप्तहेरांकडून माहिती मिळाली तेव्हा तपास यंत्रणेने शाहजेबच्या हालचालींवर नजर ठेवण्यास सुरुवात केली.

पाकिस्तानचादहशतवादी चेहरा पुन्हा एकदा जगासमोर उघडा पडला आहे. एका २० वर्षीय पाकिस्तानी नागरिक शाहजेब खान याला कॅनडातून प्रत्यार्पण करून अमेरिकेत पाठवण्यात आले आहे. शाहजेब खान न्यूयॉर्कच्या ब्रुकलिन येथील यहूदी सेंटरवर दहशतवादी हल्ला करण्याचा कट रचत होता अशी माहिती अमेरिकन तपास यंत्रणा FBI च्या हाती लागली. जर हा हल्ला यशस्वी झाला असता तर तो 9/11 नंतरचा अमेरिकतला सर्वात मोठा हल्ला असता असं FBI चीफ काश पटेल यांनी सांगितले.

शाहजेब पाकिस्तानात जन्मला आहे. तो स्टुडेंट व्हिसा घेऊन कॅनडाला गेला. तिथे मिसिसॉगा येथे राहत त्याने ISIS सोबत मिळून अमेरिकेतील यहूदी समुदायाला टार्गेट करण्याची योजना आखली होती. हल्ल्यासाठी त्याने ७ ऑक्टोबर २०२४ ची तारीख निवडली. जी इस्त्रायलने हमासवर केलेल्या हल्ल्याची वर्षपूर्ती होती. ज्यात १२०० लोक मारले गेले होते आणि २०० हून अधिक लोकांचे अपहरण करण्यात आले होते. शाहजेबने उघडपणे म्हटलं होते की, या हल्ल्यात इतके लोक मारले असते जो 9/11 नंतरचा सर्वात मोठा हल्ला मानला असता. शाहजेब नोव्हेंबर २०२३ पासून सोशल मिडिया आणि एन्क्रिप्टेड APP च्या माध्यमातून कट्टरपंथी विचारांचा प्रसार करत आहे. तो एक ऑफलाइन दहशतवादी सेल बनवू इच्छित होता. त्याने ही योजना यशस्वी करण्यासाठी AR स्टाइल रायफल, सेमी ऑटोमॅटिक शस्त्रेही खरेदी केली होती. 

FBI ला जेव्हा त्यांच्या गुप्तहेरांकडून माहिती मिळाली तेव्हा तपास यंत्रणेने शाहजेबच्या हालचालींवर नजर ठेवण्यास सुरुवात केली. अमेरिकन अंडरकवर एजेंटने शाहजेबशी संपर्क साधला. त्याला विना ओळख दाखवता त्याच्याकडून शस्त्रे खरेदी आणि अमेरिकेची सीमा पार करून देण्यासाठी मदत मागितली. जेव्हा FBI ला शाहजेबचा हेतू स्पष्ट झाला, पुरावे सापडले तेव्हा सप्टेंबर २०२४ साली कॅनडाच्या क्यूबेक प्रांतातून त्याला अटक करण्यात आली. हा परिसर अमेरिकेच्या सीमेपासून केवळ २० किमी दूर आहे. अटकेनंतर शाहजेबला कोर्टात हजर केले आणि त्याला अमेरिकेला प्रत्यार्पण करण्यात आले. आता त्याच्यावर पुढील खटला न्यूयॉर्क कोर्टात चालवला जाणार आहे.

Major news… earlier this afternoon, Muhammad Shahzeb Khan, a Pakistani citizen residing in Canada, was extradited to the United States on charges of attempting to provide material support to ISIS and attempting to commit acts of terrorism.

In the fall of last year, Khan…

— FBI Director Kash Patel (@FBIDirectorKash) June 10, 2025

दरम्यान,कॅनडात ज्या खोलीत शाहजेब राहत होता, तिथे त्यांचा शांत स्वभाव आणि सामान्य जीवन पाहून कुणालाही तो दहशतवादी कट रचतोय याची भनक लागली नाही. त्याच्या अटकेनंतर आसपासचे लोकही हैराण झाले. शाहजेब याने अमेरिकेत हल्ला करण्यासाठी न्यूयॉर्क हे शहर यासाठी निवडले कारण तिथे सर्वाधिक यहूदी लोक राहतात. त्यामुळे जास्तीत जास्त यहुदींना टार्गेट करण्याचा त्याचा प्लॅन होता. तपासात त्याने अमेरिकेतील 9/11 हल्ल्यानंतरचा हा सर्वात मोठा हल्ला असता इतके लोक मारले गेले असते असं सांगितल्याची माहिती FBI ने दिली.