वॉशिंग्टन: राष्ट्राध्यक्ष डोनाल्ड ट्रम्प यांनी अफगाणिस्तान, म्यानमार, चाड, काँगो प्रजासत्ताक, इक्वेटोरियल गिनी, एरिट्रिया, हैती, इराण, लिबिया, सोमालिया, सुदान, येमेन या बारा देशांतील नागरिकांच्या अमेरिका प्रवेशावर संपूर्ण बंदी घातली, तर बुरुंडी, क्यूबा, लाओस, सिएरा लिओन, टोगो, तुर्कमेनिस्तान, व्हेनेझुएला या सात देशांतील नागरिकांवर अंशत: प्रवेशबंदी घातली आहे. हा आदेश येत्या सोमवारी, ९ जूनपासून लागू होणार आहे.
सुरक्षेला असलेला धोका आणि व्हिसा कालावधी संपूनही लोक बेकायदेशीर वास्तव्य करत असल्याने उद्भवलेल्या समस्यांमुळे हा निर्णय घेतल्याचे ट्रम्प यांनी म्हटले. त्यांनी २०१७ सालीही काही देशांतील नागरिकांना प्रतिबंध केला होता. त्याचाच पुढील टप्पा म्हणून हा आदेश जारी करण्यात आला. अमेरिकेत होणाऱ्या दहशतवादी कारवाया रोखण्यासाठी ट्रम्प यांनी काही देशातील नागरिकांवर निर्बंध लागू केले होते. (वृत्तसंस्था)
या कारणांसाठी केली अमेरिकेत प्रवेशबंदी
अफगाणिस्तान हा तालिबानच्या नियंत्रणाखालील देश असून, तिथे ओळखपत्र प्रणालीचा अभाव आहे. येथील लोकांनी व्हिसाची मुदत संपल्यावरही बेकायदेशीर वास्तव्य केले. म्यानमारमधून अमेरिकेत पर्यटक म्हणून आलेल्यांपैकी २७ टक्के, विद्यार्थ्यांपैकी ४२ टक्के लोकांनी व्हिसा संपल्यावरही बेकायदेशीर वास्तव्य केले. असेच वर्तन चाड, काँगो प्रजासत्ताक, इक्वेटोरियल गिनी, एरिट्रिया, हैती, इराण, लिबिया, सोमालिया, सुदान, येमेन या देशांतील नागरिकांनी अमेरिकेत केले आहे.
हार्वर्ड विद्यापीठात परदेशी विद्यार्थ्यांना बंदी घालणार
हार्वर्ड विद्यापीठात शिक्षण घेण्यासाठी येणाऱ्या सर्व परदेशी विद्यार्थ्यांना अमेरिकेत येण्यास बंदी घालण्यासाठी राष्ट्राध्यक्ष डोनाल्ड ट्रम्प यांनी हालचाल सुरू केली आहे. या विद्यापीठातील एक चतुर्थांश विद्यार्थी विदेशी आहेत. तेथील आंतरराष्ट्रीय विद्यार्थ्यांचा प्रवाह रोखण्याचा अमेरिकी राष्ट्राध्यक्षांचा प्रयत्न आहे. परदेशी नागरिकांना प्रवेश नाकारण्याचे अधिकार राष्ट्राध्यक्षांना आहेत.
हार्वर्डमधील ८०० भारतीय विद्यार्थीही मोठ्या संकटात
अमेरिकेचे अध्यक्ष डोनाल्ड ट्रम्प यांच्या प्रशासनाने हार्वर्ड विद्यापीठात परदेशी विद्यार्थी असूच नयेत अशा दृष्टीने हालचाली सुरू केल्याने तिथे असलेल्या ८०० भारतीय विद्यार्थ्यांसहित ६८०० परदेशी विद्यार्थी चिंताग्रस्त झाले आहेत. विद्यार्थी देवाणघेवाण उपक्रमांतर्गत हार्वर्ड विद्यापीठात प्रवेश घेतलेल्या अन्य देशांतील विद्यार्थ्यांना आता ट्रम्प प्रशासनाच्या निर्णयामुळे अडचणींचा सामना करावा लागत आहे. हार्वर्ड नवीन परदेशी विद्यार्थ्यांना यापुढे प्रवेश देऊ शकणार नाही, अशा पद्धतीने ट्रम्प यांनी निर्णय घेतले आहेत.