इराणसोबत संघर्षादरम्यान ‘या’ ठिकाणी जाणवले १०० हून अधिक भूकंपाचे धक्के, अमेरिकेने केली अणुचाचणी?  

Iran War: इस्राइल आणि अमेरिकेने इराणविरोधात सुरू केलेल्या लष्करी कारवाईमुळे आखाती देशात भीषण संघर्षाला तोंड फुटले आहे. यादरम्यान, अमेरिकेतील नेवाडा प्रांतामध्ये १०० हून अधिक भूकंपाचे धक्के जाणवल्याने खळबळ उडाली आहे.

इस्राइल आणि अमेरिकेने इराणविरोधात सुरू केलेल्या लष्करी कारवाईमुळे आखाती देशात भीषण संघर्षाला तोंड फुटले आहे. यादरम्यान, अमेरिकेतील नेवाडा प्रांतामध्ये १०० हून अधिक भूकंपाचे धक्के जाणवल्याने खळबळ उडाली आहे. ज्या ठिकाणी हे भूकंपाचे धक्के जाणवले त्या ठिकाणी अण्वस्रे ठेवण्यात आली होती, असे सांगण्यात येत आहे. या गोपनीय ठिकाणाबाबत जगाला फारच त्रोटक माहिती आहे. या भागाला एरिया-५२ म्हणून ओळखले जाते. हा भाग अणुचाचण्यांसाठी प्रसिद्ध असल्याने आणि इथेच भूकंप झाल्याने इराणसोबतच्या संघर्षादम्यान, इराणने अणुचाचणी केली आहे का? असा प्रश्न उपस्थित केला जात आहे.

नेवाडामधील या भागाला टोनोपा टेस्ट रेंज म्हणून ओळखले जाते. गेल्या आठवडाभरात येथे १०० हून अधिक भूकंपाच्या झटक्यांची नोंद झाली आहे. तसेच हे वृत्त समोर आल्यापासून जगभरात खळबळ उडाली आहे. आपण इराणला अणुबॉम्ब तयार करू देणार नाही, असे अमेरिकेने स्पष्ट केले आहे. त्यामुळेच इराणचे सर्वोच्च नेते अयातुल्लाह खामेनेई यांच्या हत्येनंतरही अमेरिकेने इराणवरील हल्ले कमी केलेले नाहीत. मात्र अमेकिरेला प्रत्युत्तर म्हणून इराणही ड्रोन आणि क्षेपणास्त्रांद्वारे प्रतिहल्ले करत आहे.

याबाबत द सन या वृत्तपत्राने दिलेल्या माहितीनुसार रविवारी दुपारपासून सोमवारी सकाळपर्यंत सातत्याने भूकंपाचे जाणवत होते. ज्या ठिणाकी अण्वस्त्रे ठेवली आहेत ते ठिकाण लास वेगासपासून सुमारे तीन तास उत्तर पूर्वेस आणि एरिया ५१ पासून अगदी जवळ आहे.

दरम्यान, अमेरिकेचे राष्ट्राध्यक्ष डोनाल्ड ट्रम्प यांनी इराणवर अनेक आठवड्यांपर्यंत हल्ले करण्याचे संकेत दिले आहेत. मात्र सर्वोच्च नेत्याच्या मृत्यूनंतरही इराण माघार घेण्यास तयार नसल्याने हे युद्ध कसे थांबणार असा प्रश्न अनेकांना पडला आहे. त्यात इराणच्या प्रतिहल्ल्यात अमेरिकेचीही हानी होत आहेत. या संघर्षात आतापर्यंत काही अमेरिकन सैनिकांचा मृत्यू झाला आहे. मात्र वेळ पडल्यास इराणमध्ये लष्कर पाठवण्यासही मागे पुढे पाहिलं जाणार नाही, ट्रम्प यांनी स्पष्ट केले आहे. तसेच जोपर्यंत इराणची अण्वस्र क्षमता संपुष्टात येत नाही, तोपर्यंत हल्ले सुरूच ठेवले जातील, असे संकेतही ट्रम्प यांनी दिले आहेत.