“...तर इस्रायलचाच सर्वनाश होईल”; तुर्की राष्ट्राध्यक्षांचा इशारा, गाझापट्टी संहाराचा निषेध

Israel Hamas Conflict: युद्धाची काही मूल्ये असावीत. परंतु दुर्दैवाने गाझापट्टीत गंभीर उल्लंघन केले जात आहे, असे तुर्कस्तानच्या राष्ट्राध्यक्षांनी म्हटले आहे.

Israel Hamas Conflict: गाझापट्टीत हमास आणि इस्रायल यांच्यात प्रचंड संघर्ष पाहायला मिळत आहे. या संघर्षात अनेक देशांनी इस्रायलला पाठिंबा दिला आहे. गाझामध्ये मोठ्या प्रमाणावर जीवित आणि वित्तहानी झाली आहे. या संघर्षाच्या पार्श्वभूमीवर एकीकडे अनेक देश इस्रायलच्या बाजूने असताना तुर्कस्तानचे राष्ट्राध्यक्ष एर्दोगन यांनी पंतप्रधान नेतन्याहू यांच्यावर जोरदार टीका करताना गाझापट्टीतील संहाराचा निषेध नोंदवत इशारा दिला. 

गाझापट्टीत इस्रायल एक देश म्हणून सामोरा जात नाही. इस्रायलच्या लष्कराकडून गाझापट्टीवर बॉम्बचा वर्षाव करण्यात येत आहे. याचा निषेध असून, इस्रायलने हे विसरू नये की, एखाद्या देशाऐवजी एखाद्या संघटनेप्रमाणे काम केल्यास त्यांचाच सर्वनाश होईल, असा इशारा एर्दोगन यांनी दिला. युद्धाचीही काही मूल्ये असावीत आणि दोन्ही बाजूंनी त्यांचे पालन केले पाहिजे. परंतु दुर्दैवाने, इस्रायल आणि गाझापट्टीत या तत्त्वांचे गंभीर उल्लंघन केले जात आहे. इस्रायलच्या हद्दीतील नागरिकांची हत्या आणि गाझामधील निष्पाप लोकांच्या हत्याकांडाचा एर्दोगन यांनी तीव्र शब्दात निषेध केला.

इस्रायल-पॅलेस्टाईन संघर्ष हे मध्यपूर्वेतील सर्व समस्यांचे मूळ आहे

इस्रायल आणि पॅलेस्टाईन यांच्यात सुरू असलेले युद्ध थांबवण्यासाठी तुर्कस्तान राजनैतिक प्रयत्नांसाठी कटिबद्ध आहे. प्रादेशिक शांतता प्रस्थापित करण्यासाठी दोन देशांत ठराव हा एकमेव मार्ग आहे. इस्रायल-पॅलेस्टाईन संघर्ष हे मध्यपूर्वेतील सर्व समस्यांचे मूळ आहे, जोपर्यंत ही समस्या न्याय्य आणि न्याय्य पद्धतीने सोडवली जात नाही, तोपर्यंत हे प्रदेश शांतता प्रस्थापित होण्यापासून दूरच राहील, असे एर्दोगन यांनी म्हटले. 

दरम्यान, हमासच्या दहशतवाद्यांना मोठा फटका बसला आहे. गाझा पट्टीत इस्रायली लढाऊ विमाने आणि विमानांवर नजर ठेवण्यासाठी दहशतवादी संघटनेने अ‍ॅडव्हान्स डिटेक्शन सिस्टम बसवली होती. या तंत्रज्ञानाच्या मदतीने गाझावरून येणाऱ्या-जाणाऱ्या कोणत्याही प्रकारच्या विमानांवर लक्ष ठेवता येत होते. यासाठी हमासने गाझा पट्टीतील अनेक इमारतींच्या छतावर उच्च दर्जाचे कॅमेरे बसवले होते. हे कॅमेरे सौर पॅनेलच्या खाली लपून बसवण्यात आले होते, जेणेकरून ते दिसू नयेत. तसेच ड्रोन, विमान किंवा उपग्रहाद्वारे त्यांचा शोध घेता येत नाही. मात्र इस्रायलच्या हवाई हल्ल्यांमुळे हमासचे हे ट्रॅकिंग नेटवर्क मोठ्या प्रमाणात उद्ध्वस्त झाले आहेत.