इराण जुमानत नाहीय...! डोनाल्ड ट्रम्प उद्या मोठी घोषणा करण्याची शक्यता; जागतिक बाजारात तेजी, UAE कडून लष्करी हालचालींचे संकेत

Donald Trump Iran War News: अमेरिकेचे राष्ट्राध्यक्ष डोनाल्ड ट्रम्प उद्या राष्ट्राला संबोधित करणार असून इराण युद्ध समाप्तीचे संकेत दिले आहेत. चीन-पाकिस्तानचा शांती प्रस्ताव आणि UAE ची लष्करी तयारी; वाचा सविस्तर घडामोडी.

गेल्या अनेक महिन्यांपासून सुरू असलेल्या अमेरिका-इराणयुद्धाला आता पूर्णविराम मिळण्याची शक्यता निर्माण झाली आहे. अमेरिकेचे राष्ट्राध्यक्ष डोनाल्ड ट्रम्प उद्या (२ एप्रिल) भारतीय वेळेनुसार पहाटे ६:३० वाजता राष्ट्राला संबोधित करणार आहेत. या संबोधनात ते इराणयुद्धाच्या समाप्तीची अधिकृत घोषणा करू शकतात, अशी दाट शक्यता आहे.

ट्रम्प यांनी नुकतेच संकेत दिले आहेत की अमेरिकेने आपले लष्करी उद्दिष्ट साध्य केले आहे. विशेष म्हणजे, जागतिक व्यापारासाठी महत्त्वाचा असलेला 'होर्मुजचा जलमार्ग' खुला असो वा बंद, त्याने अमेरिकेला काही फरक पडत नाही, असे धाडसी विधान त्यांनी केले आहे. ट्रम्प यांच्या "युद्ध २-३ आठवड्यात संपेल" या विधानामुळे जागतिक राजकारणात खळबळ उडाली आहे.

चीन-पाकिस्तानचा 'पंचसूत्री' शांती प्रस्तावएकीकडे अमेरिका घोषणा करण्याच्या तयारीत असतानाच, ३१ मार्च रोजी बीजिंगमध्ये चीन आणि पाकिस्तान यांच्यात उच्चस्तरीय बैठक पार पडली. चीनचे परराष्ट्र मंत्री वांग यी आणि पाकिस्तानचे इशाक डार यांनी इराण युद्धावर 'पंचसूत्री शांतता योजना' मांडली आहे. यात तात्काळ युद्धबंदी आणि चर्चेवर भर दिला आहे. इराणने पाकिस्तानच्या थेट मध्यस्थीला विरोध केला असला, तरी शांततेच्या आवाहनाचे स्वागत केले आहे.

शेअर बाजारात 'सुनामी'ट्रम्प यांच्या विधानाचे पडसाद आशियाई शेअर बाजारात उमटले आहेत. युद्ध संपण्याच्या आशेने गुंतवणूकदारांनी जोरदार खरेदी केली. 

दक्षिण कोरिया (KOSPI): ६% पेक्षा जास्त उसळी.

जपान (Nikkei 225): ३.८७% वाढ.

सिंगापूर (Straits Times): १.७% ची तेजी.

UAE कडून लष्करी कारवाईचे संकेत?दुसरीकडे, युएई होर्मुजचा जलमार्ग सुरू करण्यासाठी लष्करी बळाचा वापर करण्याच्या तयारीत असल्याची बातमी 'टाइम्स ऑफ इस्रायल'ने दिली आहे. यासाठी संयुक्त राष्ट्रात प्रस्ताव आणण्याची आणि आंतरराष्ट्रीय लष्करी युती करण्याची तयारीही सुरू आहे.