अमेरिकेच्या बंकर बस्टर बॉम्बची ताकद किती? हा बॉम्ब कुणी बनवला?
By ऑनलाइन लोकमत | Updated: June 23, 2025 14:08 IST2025-06-23T14:05:36+5:302025-06-23T14:08:12+5:30
Bunker Buster Bomb: अमेरिकेच्या न्यू मेक्सिको राज्यातील व्हाइट सॅन्ड्स मिसाइल रेंजमध्ये या शस्त्राची चाचणी घेण्यात आली होती.
अमेरिकेच्या बंकर बस्टर बॉम्बची ताकद किती? हा बॉम्ब कुणी बनवला?
अमेरिकेकडे असलेल्या एका अत्यंत धोकादायक अशा बॉम्बची सध्या जगभरात चर्चा सुरू झाली आहे. जीबीयू-५७ए/बी मॅसिव्ह ऑर्डेनन्स पेनेट्रेटर बॉम्ब असे त्याचे नाव असून, त्याचाच वापर अमेरिकेने इराणचा भूमिगत अणू तळ नष्ट करण्यासाठी केला.
वजन सुमारे १३,६०० किलो
सुमारे १३,६०० किलो वजनाचा एक बॉम्ब असे अनेक बॉम्ब टाकून इराणचे फॉर्डो आण्विक केंद्र नष्ट केले. यासोबत अमेरिकेच्या पाणबुड्यांनीही ३० टोमाहॉक क्षेपणास्त्रे इराणच्या नतांझ, इस्फहान आण्विक केंद्राच्या दिशेने डागली.
नतांझवर एक बस्टर बॉम्बही टाकण्यात आला. अचूक लक्ष्य भेदणारे सुमारे १३,६०० किलो वजनाचे हे शस्त्र कदाचित इराणच्या भूमिगत फोर्दो अणू केंद्रापर्यंत पोहोचू शकते. फोर्दो अणू केंद्र एका डोंगराच्या आत आहे.
हा बॉम्ब कुणी बनवला?
हा बॉम्ब बोइंग कंपनीने बनवला आहे आणि एमओपीचा आजपर्यंत कधीही युद्धामध्ये वापर झालेला नाही. अमेरिकेच्या न्यू मेक्सिको राज्यातील व्हाइट सॅन्ड्स मिसाइल रेंजमध्ये या शस्त्राची चाचणी घेण्यात आली आहे.
किती धोकादायक?
जीबीयू-५७ए/बी हे एक ‘अत्यंत धोकादायक भेदक शस्त्र’ आहे. खोल भूगर्भात असलेल्या आणि मजबूत बंकरांवर हल्ला करण्याची त्यात क्षमता आहे.
६.२ मीटर लांबी असलेला हा बॉम्ब स्फोटापूर्वी जमिनीत सुमारे ६१ मीटर आत घुसू शकतो. खोलवर ड्रिल करून आत जाऊन तो मोठा स्फोट घडवून आणतो.
काही तासांत जगात कुठेही जाते?
या लांब पल्ल्याच्या बॉम्बर्सची रेंज इंधन न भरता सुमारे ११,००० किलोमीटर इतकी आहे, तर एकदा उड्डाणादरम्यान इंधन भरल्यावर ही रेंज १८,५०० किलोमीटरपर्यंत वाढू शकते. त्यामुळे हे विमान जगाच्या पाठीवर कोणत्याही ठिकाणी काही तासांत पोहोचू शकते.