इराणच्या तेलसाठ्यांवर भीषण हल्ले; ज्वालांनी तेहरानचे आकाश व्यापले, आणखी हल्ले होणार

इस्रायलचा इशारा, यूएईवरही हल्ले

दुबई : इस्रायलने शनिवारी रात्री तेहरानमधील तेल साठवण केंद्रावर हल्ला केला. या हल्ल्यात चार टँकर चालकांचा मृत्यू झाला. इस्रायलचा हा नागरी औद्योगिक ठिकाणावरील पहिला हल्ला मानला जात आहे. या हल्ल्यात ईशान्य तेहरानमधील आघदस्ये तेल गोदाम, दक्षिण तेहरानमधील तेहरान रिफायनरी, पश्चिम तेहरानमधील शहरान तेल डेपो आणि करज शहरातील तेल डेपो यांना लक्ष्य करण्यात आले. इराणच्या फार्स वृत्तसंस्थेने सांगितले की, या तेलसाठवण केंद्रामध्ये स्फोट झाल्याने मोठ्या आगी लागल्या असून अनेक तास स्फोटाचे आवाज तेहरानमध्ये ऐकू येत होते. आगीच्या धुराचे मोठे लोट तेहरानच्या आकाशात दिसत होते.

हे हल्ले इतके भीषण होते की तेल साठवण केंद्रातून रस्त्यावर तेल वाहू लागले आणि या वाहणाऱ्या तेलाने पेट घेतलेला दिसत होता. इस्रायलने या हल्ल्यांचे समर्थन करताना दावा केला की, या तेल साठवण केंद्रातून इराणच्या लष्कराला तेल पुरवले जात होते.

दरम्यान रविवारी सकाळी इस्रायलने दक्षिण लेबनॉनवर पुन्हा हल्ले चढवले. या हल्ल्यांमध्ये १२ जणांचा मृत्यू झाला. त्यामुळे लेबनॉनमधील मृतांचा आकडा ४०० च्या वर गेला आहे. इस्रायलने लेबनॉनमधील नागरिकांना स्थलांतर करण्याचे आदेश दिले आहेत. रविवारी इस्रायलचे पंतप्रधान बेंजामिन नेतान्याहू यांनी पुढील टप्प्यात अनेक मोठ्या कारवाया होतील असे जाहीर केले.

इराणचा बहरीनमधील पाणी विलवणीकरण केंद्रावर हल्ला

रविवारी इराणच्या ड्रोन हल्ल्यात बहरीनमधील पाणी विलवणीकरण केंद्राचे मोठ्या प्रमाणात नुकसान झाल्याचे वृत्त आहे. युद्धाला ९ दिवस होत असताना पहिल्यांदाच इराणकडून पाणी विलवणीकरण केंद्रावर हल्ले करण्यात आले आहेत. पर्शियाच्या आखातात किनाऱ्यावर शेकडो पाणी विलवणीकरण केंद्रे असून या प्रदेशातील अरब देश पिण्याच्या पाण्यासाठी या केंद्रांवर अवलंबून असतात.

इस्रायल आणि जॉर्डनवर हल्ल्याचा इराणचा दावा

इराणच्या इस्लामिक रिव्होल्युशनरी गार्ड्स कॉर्प्सने इस्रायलमधील तेल अवीव आणि बेअरशेबा शहरांतील लष्करी लक्ष्यांवर क्षेपणास्त्र हल्ले केल्याचा दावा केला. तस्नीम वृत्तसंस्थेने प्रसिद्ध केलेल्या निवेदनात आयआरजीसीने दावा केला की, जॉर्डनमधील अझराक शहरातील मुवफ्फक अल-सल्ती हवाई तळावर देखील अनेक वेळा हल्ले करण्यात आले. हा तळ अमेरिकेच्या आक्रमक लढाऊ विमानांचा सर्वात मोठा व सक्रिय तळ आहे. इराणने हे हल्ले येत्या काही तासांत व दिवसांत अधिक प्रमाणात व अधिक खोलवर होतील, असा इशारा दिला आहे.

यूएईवर १७ क्षेपणास्त्रे, ११७ ड्रोन डागले

रविवारी यूएईवर इराणने १७ बॅलिस्टिक क्षेपणास्त्रे आणि ११७ ड्रोन डागले. त्यापैकी १६ क्षेपणास्त्रे आणि ११३ ड्रोन अडवण्यात आले, तर एक क्षेपणास्त्र आणि चार ड्रोन समुद्रात कोसळल्याचे मंत्रालयाने सांगितले.

युद्ध सुरू झाल्यांनतर इराणने आजपर्यंत यूएईवर २३८ बॅलिस्टिक क्षेपणास्त्रे, १,४२२ ड्रोन व आठ क्रूझ क्षेपणास्त्रांनी हल्ले केले आहेत. या हल्ल्यांमध्ये आजपर्यंत चार जणांचा मृत्यू झाला आहे. मृतांमध्ये पाकिस्तान, नेपाळ आणि बांग्लादेशचे नागरिक असल्याचे यूएई संरक्षण मंत्रालयाने सांगितले.

इस्रायलमध्ये २ हजार जखमी

इस्रायलच्या आरोग्य मंत्रालयाने सांगितले की, युद्ध सुरू झाल्यापासून आतापर्यंत १,९२९ लोक जखमी झाले असून त्यांना रुग्णालयात दाखल करण्यात आले आहे.

२२ इराणी नाविकांना रुग्णालयातून सुट्टी

कोलंबो : अमेरिकेच्या हल्ल्यात जखमी झालेल्या इराणी नौदलाच्या 'आईरिस देना' या जहाजावरच्या २२ नाविकांना रुग्णालयातून रविवारी सुटी देण्यात आली. या सैनिकांना अत्यंत कडक सुरक्षा व्यवस्थेत अॅम्ब्युलन्सने गालेजवळील कोग्गला येथील श्रीलंका हवाई दलाच्या केंद्रात हलवण्यात आले. गालेमधील करापितिया राष्ट्रीय रुग्णालयात अजून १० नाविकांवर उपचार सुरू आहेत.

गेल्या आठवड्यात ५ मार्च रोजी श्रीलंकेच्या दक्षिण किनाऱ्याजवळ अमेरिकेच्या पाणबुडीने टॉर्पोडो हल्ल्यात इराणची 'आईरिस देना' ही युद्धनौका बुडवली होती. यात ८४ इराणी नाविक मारले गेले होते. ही नौका भारतातील विशाखापट्टणम बंदरातून परत जात असताना हा हल्ला झाला होता. या हल्ल्याची गाले शहरात न्यायालयीन चौकशी झाली. या हल्ल्यात मरण पावलेल्या ८४ मृतांपैकी ८० जणांची ओळख पटली आहे.

सर्वांकडून आंतरराष्ट्रीय कायद्याला तिलांजली

१. मॉस्को: अमेरिका आणि इस्रायलने इराणवर केलेल्या हल्ल्याने जी परिस्थिती निर्माण झाली ती पाहता सर्वांनी आंतरराष्ट्रीय कायद्याला तिलांजली दिल्याचा गंभीर आरोप रशियाने केला आहे. रशियाने युद्धाच्या पार्श्वभूमीवर संयुक्त राष्ट्र सुरक्षा परिषदेच्या पाच कायम सदस्यांची (पी-५) तातडीने शिखर परिषद बोलावण्याची मागणी केली आहे.

२. आज कोणते नियम लागू आहेत आणि त्यांचे पालन कसे करायचे, हे स्पष्टपणे सांगणे कोणालाही शक्य नाही. कारण ते नियम प्रत्यक्षात अस्तित्वात राहिलेले नाहीत. आंतरराष्ट्रीय कायदा कागदोपत्री अजूनही अस्तित्वात आहे; मात्र प्रत्यक्ष व्यवहारात तो लागू होत नाही, असे रशियाने म्हटले आहे.

३. पुतीन यांनी कोविड-१९ रशियाचे अध्यक्ष व्लादिमीर महासाथीच्या काळातच अशा शिखर परिषदेचा प्रस्ताव मांडला होता. त्या बैठकीत रशिया, अमेरिका, चीन, फ्रान्स आणि ब्रिटन या पाच देशांनी जागतिक सुरक्षा, स्थैर्य व आंतरराष्ट्रीय व्यवस्थेच्या भवितव्यावर सविस्तर चर्चा करावी, अशी कल्पना होती. त्यावर रशियाने या देशांच्या बैठकीची मागणी केली आहे.