Iran Israel War: खामेनींचे अस्तित्वच मिटवा, इस्रायलचा लष्कराला आदेश

Iran Israel War News: इराणने इस्रायलमधील बेर्शेबा शहरातील सोरोका रुग्णालयावर केलेल्या हल्ल्यात ४० जण जखमी झाले.

बेर्शेबा : इराणनेइस्रायलमधील बेर्शेबा शहरातील सोरोका रुग्णालयावर केलेल्या हल्ल्यात ४० जण जखमी झाले; पण कोणाचीही प्रकृती चिंताजनक नसल्याचे सांगण्यात आले. या हल्ल्यात त्या रुग्णालय इमारतीचे मोठे नुकसान झाले. तेल अवीवमधील एक गगनचुंबी इमारत व अन्य इमारतींवरही इराणने हल्ले केला. त्यामुळे संतप्त झालेले इस्रायलचे संरक्षणमंत्री इस्राएल कात्झ यांनी सांगितले की, इराणचे सर्वोच्च नेता अयातुल्ला अली खामेनी यांचे अस्तित्व संपवून टाकण्याचा आदेश आमच्या लष्कराला देण्यात आला आहे. दुसरीकडे, इस्रायलने इराणच्या अणुऊर्जा कार्यक्रमाचा भाग असलेल्या अराक हेवी वॉटर अणुऊर्जा प्रकल्पावर देखील हल्ला केला असून त्यात किती हानी झाली हे लगेच कळू शकलेले नाही.

सोरोका रुग्णालयातील शस्त्रक्रिया विभागाची जुनी इमारत इराणशी सुरू झालेल्या संघर्षानंतर रिकामी करण्यात आली होती. या रुग्णालयात सध्या फक्त प्रकृती चिंताजनक असलेल्यांवर उपचार करण्यात येत आहेत. इराणमध्ये आतापर्यंत ६३९ जण मृत्युमुखी पडले असून, त्यात २६३ नागरिकांचा समावेश आहे, तसेच १,३०० हून अधिक लोक जखमी झाले आहेत. 

इराणची जिनिव्हा येथे आज ब्रिटन आणि फ्रान्सशी चर्चा
इराणचे परराष्ट्रमंत्री अब्बास अराघची शुक्रवारी युरोपीय देशांतील परराष्ट्र मंत्र्यासमवेत जिनिव्हा येथे बैठक घेणार आहेत. इस्रायलने सुरू केलेल्या संघर्षाबाबत इराण हा ब्रिटन, फ्रान्स, जर्मनी व युरोपियन युनियनचे प्रमुख पदाधिकारी यांच्याकडे भूमिका मांडणार आहे. अमेरिकेचे अध्यक्ष डोनाल्ड ट्रम्प यांनी नुकतेच म्हटले होते की, इस्रायल-इराणमध्ये आम्हाला केवळ शस्त्रसंधी नको आहे तर त्यापेक्षाही मोठा निर्णय होणे अपेक्षित आहे. तसेच या युद्धात अमेरिकेच्या संभाव्य सहभागाची शक्यता त्यांनी फेटाळली नाही. त्यावर इराणने इशारा दिला की, अमेरिकेने या संघर्षात हस्तक्षेप केल्यास त्याचे गंभीर परिणाम भोगावे लागतील.

लोकांना रिॲक्टर परिसर रिकामा करण्याचा इशारा
इस्रायलने इराणच्या अरक हेवी वॉटर अणुऊर्जा प्रकल्पावर हल्ला करण्याच्या काही तासांपूर्वी इस्रायली आर्मीने अरक आणि खोंडूब शहरांतील लोकांना हा परिसर रिकामा करण्याचा इशारा दिला होता.  अरकमधील एक हेवी वॉटर रिॲक्टर हा इराणच्या अणुकार्यक्रमाचा एक महत्त्वाचा भाग आहे. यासोबतच अरकमध्ये मोठ्या प्रमाणात शस्त्रे तयार केली जातात. याशिवाय, खोंडूबमध्ये एक आयआर-४० हेवी वॉटर रिॲक्टर देखील आहे, जो इराणच्या अणुकार्यक्रमाचा आणखी एक महत्त्वाचा भाग आहे. हा रिॲक्टर अरकपासून सुमारे ४० किलोमीटर अंतरावर आहे. अरकप्रमाणेच, त्यावर आंतरराष्ट्रीय देखरेख आहे.