"खामेनेई मारला गेला, जगाला न्याय मिळाला!" डोनाल्ड ट्रम्प यांचा मोठा दावा; संयुक्त राष्ट्राकडून महायुद्धाचा इशारा

Ali Khamenei killed in airstrike news: अमेरिकेचे राष्ट्राध्यक्ष डोनाल्ड ट्रम्प यांनी अयातुल्ला अली खमेनेईच्या मृत्यूची पुष्टी केली आहे. इराण-इस्रायल युद्धामुळे जागतिक शांतता धोक्यात आली असून युएन सुरक्षा परिषदेची आणीबाणीची बैठक सुरू झाली आहे. वाचा सविस्तर.

इराणचे सर्वोच्च नेते अयातुल्ला अली खामेनेई यांचा इस्रायल आणि अमेरिकेच्या संयुक्त कारवाईत मृत्यू झाला आहे, अशी अधिकृत घोषणा अमेरिकेचे राष्ट्राध्यक्ष डोनाल्ड ट्रम्प यांनी केली आहे. ट्रम्प यांनी आपल्या 'ट्रुथ सोशल' प्लॅटफॉर्मवर पोस्ट करत म्हटले की, खामेनेई आमच्या अत्याधुनिक ट्रॅकिंग सिस्टम आणि इंटेलिजन्सपासून वाचू शकला नाही.

"खामेनेईचा मृत्यू हा इराणच्या जनतेसाठी आणि ज्यांना त्याने त्रास दिला, त्या जगातील तमाम लोकांसाठी मिळालेला न्याय आहे," असे ट्रम्प यांनी म्हटले. अमेरिकेने या मोहिमेत इस्रायलला पूर्ण तांत्रिक आणि लष्करी सहकार्य केल्याचेही त्यांनी स्पष्ट केले. खामेनेई आणि त्यांच्या समर्थकांचा धोका आता संपल्याचा दावा ट्रम्प यांनी केला आहे.

संयुक्त राष्ट्र चिंतेत
युएनचे सरचिटणीस अँटोनियो गुटेरेस यांनी या परिस्थितीला आंतरराष्ट्रीय शांतता आणि सुरक्षेसाठी 'गंभीर धोका' म्हटले आहे. गुटेरेस यांनी इशारा दिला की, या लष्करी कारवाईमुळे मध्य पूर्वेमध्ये अशा घटनांची साखळी सुरू होईल, जी कोणाच्याही नियंत्रणात नसेल.

सुरक्षा परिषदेची बैठक
इराणमधील २० शहरांवर झालेल्या हल्ल्यांनंतर संयुक्त राष्ट्र सुरक्षा परिषदेने तातडीची आपत्कालीन बैठक बोलावली आहे. गुटेरेस यांनी हिंसा थांबवून चर्चेने मार्ग काढण्याचे आवाहन केले आहे.