आता डिप्लोमसीला काहीच अर्थ राहिला नाही; इस्रायलने हल्ला केला तेव्हाच..., इराणी परराष्ट्र मंत्र्यांचा युरोपवर आरोप

America attack on Iran: इराणच्या तीन अणुस्थळांवर झालेल्या हल्ल्यानंतर न्यू यॉर्क आणि वॉशिंग्टन डीसीसह अमेरिकेच्या अनेक प्रमुख शहरांमध्ये सुरक्षा वाढवण्यात आली आहे.

अमेरिकेसोबत चर्चा सुरु असताना इस्रायलनेइराणवर हल्ला चढविला होता. यानंतर इराणनेइस्रायलला चोख प्रत्यूत्तर देण्यास सुरुवात केली आहे. अशातच अमेरिकेने देखील आज इराणच्या तीन अणू प्रकल्पांवर हल्ला चढविला आहे. ब्रिटनने यावर इराणने राजनैतिक चर्चेतून मार्ग काढावा असा सल्ला दिला आहे. यावर इराणचे परराष्ट्र मंत्र्यांनी अमेरिका आणि युरोपच्या दुटप्पी वागण्याचे आरोप केले आहेत. 

अमेरिकेने केलेल्या हल्ल्यानंतर आता राजनैतिक चर्चेला काही अर्थ उरला नाही. कुटनीतिचा रस्ता कायम खुला ठेवायचा हे जरी योग्य असले तरी आता ती परिस्थिती राहिलेली नाही, असे अब्बास अराकची यांनी म्हटले आहे. जेव्हा अमेरिकेसोबत चर्चा सुरु होती तेव्हा इस्रायलने आमच्यावर हल्ला केला. तिथेच कुटनीती संपली. यानंतर जेव्हा आम्ही युरोपिय देशांशी चर्चा करत होतो तेव्हा आता अमेरिकेने हल्ला केला आणि ती प्रक्रिया देखील संपविली आहे, असा आरोप अराकची यांनी केला आहे. 

एवढे सर्व होऊनही आता युरोप कसे काय सांगू शकतो की इराणने चर्चेच्या रस्त्यावर परतावे, असा सवालही अराकची यांनी केला. आम्ही जर चर्चा सोडलीच नाही तर परत कसे येऊ, ती बंद करायचे आम्ही तर ठरविले नाही. आमच्यावरच हल्ले करण्यात आले आहेत, असा आरोप अराकची यांनी केला आहे. 

दरम्यान, इराणच्या तीन अणुस्थळांवर झालेल्या हल्ल्यानंतर न्यू यॉर्क आणि वॉशिंग्टन डीसीसह अमेरिकेच्या अनेक प्रमुख शहरांमध्ये सुरक्षा वाढवण्यात आली आहे.  सध्या शहराला कोणताही थेट धोका दिसत नाही परंतू धार्मिक स्थळांवर सुरक्षा वाढविण्यात आल्याचे अमेरिकेतील पोलिसांनी म्हटले आहे. अमेरिकेच्या हल्ल्यानंतर इराणने इस्रायलवर जोरदार हल्ले चढविले आहेत. यामध्ये इस्रायलच्या आरोग्य मंत्रालयाच्या म्हणण्यानुसार, इराणच्या ताज्या क्षेपणास्त्र हल्ल्यात ८६ लोक जखमी झाले आहेत.