America Israel Iran War: १२०० जणांचा मृत्यू, १०००० जखमी, इमारतींसह रुग्णालय उद्ध्वस्त; युद्धात इराणचं भयंकर नुकसान!

America Israel Iran War: इस्रायल, अमेरिका आणि इराण यांच्यातील संघर्षाचा आज युद्धाचा १० वा दिवस आहे. दोन्ही बाजूंनी एकमेकांवर क्षेपणास्त्रे आणि ड्रोनचा वर्षाव सुरूच असून, या युद्धात इराणचे प्रचंड नुकसान झाले आहे. 

इस्रायल, अमेरिका आणि इराण यांच्यातील संघर्षाचा आज युद्धाचा १० वा दिवस आहे. दोन्ही बाजूंनी एकमेकांवर क्षेपणास्त्रे आणि ड्रोनचा वर्षाव सुरूच असून, या युद्धातइराणचे प्रचंड नुकसान झाले आहे. इराणच्या आरोग्य मंत्रालयाने दिलेल्या माहितीनुसार, या युद्धामुळे सर्वसामान्यांचे जीवन उद्ध्वस्त झाले असून आरोग्य व्यवस्था कोलमडली आहे.

इराणच्या आरोग्य मंत्रालयाचे प्रवक्ते हुसेन करमनपौर यांनी एक्सवर दिलेल्या माहितीनुसार, आतापर्यंत १,२०० हून अधिक नागरिक मारले गेले असून १०,००० हून अधिक जण जखमी झाले आहेत. मृतांमध्ये प्रामुख्याने निरागस मुले आणि महिलांचा समावेश आहे. मृतांमध्ये अंदाजे २०० मुले (१२ वर्षांखालील) आणि २०० महिला आहेत. तर, १,४०० महिला गंभीर जखमी झाल्या आहेत.

युद्धात इराणची आरोग्य सेवा पूर्णपणे भरडली गेली आहे. करमनपौर यांनी दिलेल्या आकडेवारीनुसार, २५ रुग्णालयांचे नुकसान झाले असून त्यापैकी ९ रुग्णालय कायमची बंद पडली आहेत. १८ आपत्कालीन केंद्रे आणि १४ रुग्णवाहिका पूर्णपणे नष्ट झाल्या आहेत. अनेक ग्रामीण आणि व्यापक आरोग्य सेवा केंद्रांनाही लक्ष्य करण्यात आले आहे. इराणी रेड क्रेसेंट सोसायटीचे प्रमुख डॉ. पीर हुसेन कोलिवंद यांनी सांगितले की, केवळ आरोग्यच नव्हे तर निवासी भागांचेही मोठे नुकसान झाले आहे. अंदाजे १०,००० निवासी आणि व्यावसायिक इमारतींचे नुकसान झाले आहे, यात ६५ शाळांचाही समावेश आहे.

जागतिक आरोग्य संघटनेचा इशारा

डब्लूएचओचे महासंचालक टेड्रोस अधानोम घेब्रेयसस यांनी या परिस्थितीवर तीव्र चिंता व्यक्त केली आहे. "संपूर्ण जग एका गंभीर संकटाचा सामना करत आहे," असे त्यांनी म्हटले आहे. या युद्धामुळे १६ देशांवर परिणाम झाला आहे. विशेषतः अण्वस्त्र वापराच्या धोक्यामुळे सार्वजनिक आरोग्याला गंभीर धोका निर्माण झाला आहे. असुरक्षिततेमुळे दुबईतील डब्लूएचओच्या लॉजिस्टिक्स हबचे कामकाजही थांबवण्यात आले आहे.

प्रमुख शहरांवर हल्ले

इराणी रेड क्रेसेंट एजन्सीच्या अहवालानुसार, ३० प्रांतांमध्ये ७५२ हून अधिक हल्ले झाले आहेत. यात तेहरान हे सर्वाधिक (३४ टक्के) प्रभावित शहर आहे. त्याखालोखाल इस्फहान (८ टक्के) आणि केरमानशाह (६ टक्के) या शहरांवर हल्ले झाले आहेत. उपग्रह प्रतिमांनुसार, २८ फेब्रुवारीपासून सुरू झालेल्या या हल्ल्यांमध्ये ऐतिहासिक स्थळे आणि शाळांनाही लक्ष्य करण्यात आले आहे.

संपर्क यंत्रणा कोलमडली

इराणमधील परिस्थिती इतकी भयावह आहे की, तिथल्या लोकांशी संवाद साधणे कठीण झाले आहे. संपूर्ण देशात इंटरनेट सेवा बंद करण्यात आली असून, जमिनीवरील वस्तुस्थितीचे व्हिडिओ किंवा माहिती मिळवणे कठीण झाले आहे.