हिंगोली जिल्हा परिषदेच्या महिला व बालकल्याण विभागाअंतर्गत जिल्ह्यात एक हजार ८९ अंगणवाड्या कार्यन्वित आहेत. यापैकी ९६२ अंगणवाडींना इमारती उपलब्ध आहेत. अंगणवाडीतील बालकांना विविध सुविधा उपलब्ध करून देण्याचा प्रयत्न या विभागाच्या वतीने केला जातो. अनेक अंगणवाड्यात खेळणी, खाऊ यासह हसत खेळत शिक्षण देण्याचा प्रयत्न केला जातो. मात्र तरीही काही बालके अंगणवाडीची इमारत पाहताच घराकडे पळ काढतात. त्यामुळे बालकांचे अंगणवाडीत लक्ष रहावे, त्यांना अंगणवाडी आपलीशी वाटवी, इमारत पाहताच लक्ष आकर्षित व्हावे, यासाठी जिल्हा परिषदेचे मुख्य कार्यकारी अधिकारी राधाबिनोद शर्मा यांच्या संकल्पनेतून अंगणवाड्यांच्या इमारती एकसमान करण्याचा उपक्रम हाती घेतला होता. अति. मुख्य कार्यकारी अधिकारी अनुप शेंगुलवार, उपमुख्य कार्यकारी अधिकारी धनवंतकुमार माळी, डॉ. पोहरे, गणेश वाघ यांच्या मार्गदर्शनाखाली केवळ दीड महिन्यात ९६२ अंगणवाडी इमारतीवर एकसमान रंगरंगोटी केली. यामुळे लहान मुले आकर्षित होण्यास मदत होणार आहे. अंगणवाड्यांची एकसमान रंगरंगोटी करणारा हिंगोली राज्यातील एकमेव जिल्हा ठरला आहे.
फोटो ६