दोन हजार लाभार्थ्यांना मिळाले हक्काचे घर
By लोकमत न्यूज नेटवर्क | Published: March 8, 2021 04:28 AM2021-03-08T04:28:25+5:302021-03-08T04:28:25+5:30
हिंगोली : जिल्ह्यातील अनुसूचित जमातीतील लाभार्थ्यांना पक्के घर उपलब्ध करून देण्यासाठी शबरी आवास योजनेंतर्गत घरकूल उपलब्ध करून देण्यात येते. ...
हिंगोली : जिल्ह्यातील अनुसूचित जमातीतील लाभार्थ्यांना पक्के घर उपलब्ध करून देण्यासाठी शबरी आवास योजनेंतर्गत घरकूल उपलब्ध करून देण्यात येते. फेब्रुवारी महिन्यापर्यंत जिल्ह्यातील २ हजार १८८ लाभार्थ्यांनी या योजनेचा लाभ घेत पक्क्या घराचे स्वप्न पूर्ण केले आहे.
जिल्ह्यातील अनुसूचित जमाती प्रवर्गातील लाभार्थ्यांना हक्काचे पक्के घर उपलब्ध व्हावे, त्यांच्या निवाऱ्याचा प्रश्न मिटावा, यासाठी शबरी घरकूल योजना मंजूर करण्यात आली आहे. जिल्ह्यात २०१६-१७ ते २०२०-२१ या काळात २ हजार ९८३ घरकुले बांधकामाचे उद्दिष्ट देण्यात आले होते. जिल्हा ग्रामीण विकास यंत्रणेमार्फत घरकूल बांधकामासाठी पुढाकार घेण्यात आला होता. त्यानुसार, फेब्रुवारी, २०२१ पर्यंत जिल्ह्यातील २ हजार १८८ लाभार्थ्यांनी घराचे बांधकाम पूर्ण केले आहे, तर २ हजार ७१३ लाभार्थ्यांना अनुदानाचा पहिला हप्ता देण्यात आला. २ हजार ३२३ लाभार्थ्यांना दुसरा, २ हजार ११९ लाभार्थ्यांना तिसरा तर १ हजार १९५ लाभार्थ्यांना अनुदानाचा चौथा हप्ता देण्यात आला आहे. आता केवळ ७९५ घरकुलाची कामे अपूर्ण आहेत.
कळमनुरी तालुक्याला सर्वाधिक उद्दिष्ट
जिल्ह्याला शबरी योजनेंतर्गंत २ हजार ९८३ घरकूल बांधकामाचे उद्दिष्ट देण्यात आले होते. त्यात औंढा नागनाथ तालुक्यासाठी ६५० घरकुले बांधकामाचे उद्दिष्ट दिले होते. त्यापैकी ४५३ घरकुले पूर्ण झाली आहेत. वसमत २४४ पैकी २०३, हिंगोली २०७ पैकी १६४, कळमनुरी १ हजार ६५० पैकी १ हजार २१९, तर सेनगाव २३२ पैकी १४९ घरकुलांची बांधकामे पूर्ण झाली आहेत.