हिंगोली : कोरोनाबाधितांची संख्या वाढत असल्याने नातेवाइकांनी कोरोना वाॅर्डात येऊ नये, अशा सूचना जिल्हाधिकारी रुचेश जयवंशी यांनी दिल्या आहेत. मात्र, १ एप्रिल रोजी जिल्हाधिकाऱ्यांनी अचानक भेट दिली असता १० नातेवाईक या वॉर्डात आढळून आले. त्यामुळे त्यांना तातडीने कोरोना केअर सेंटरमध्ये पाठविण्यात आले आहे.
हिंगोलीतील ॲक्टिव्ह असलेल्या कोरोना रुग्णांची संख्या ७६१ वर पोहोचली आहे. गंभीर व अतिगंभीर असलेल्या ११९ रुग्णांवर शासकीय रुग्णालयात उपचार सुरू आहेत. या ठिकाणी नातेवाइकांनी येऊ नये, अशा स्पष्ट सूचना जिल्हाधिकारी रुचेश जयवंशी यांनी दिल्या आहेत. मात्र, त्यानंतरही काही रुग्णांचे नातेवाईक या ना त्या कारणाने येत आहेत.
दरम्यान, गुरुवारी दुपारी जिल्हाधिकारी जयवंशी यांनी शासकीय रुग्णालयाच्या कोरोना वॉर्डाला अचानक भेट दिली. जिल्हाधिकारी आल्याचे समजताच आरोग्य प्रशासनाची चांगलीच धावपळ झाली. यावेळी जयवंशी यांनी रुग्णांशी संवाद साधून आरोग्य सेवा व इतर सुुविधांबाबत माहिती घेतली. गंभीर व अतिगंभीर रुग्णांसाठी स्वतंत्र व्यवस्था करण्यासोबतच त्यांच्यावर २४ तास लक्ष ठेवण्याच्या सूचनाही दिल्या.
यावेळी काही रुग्णांजवळ त्यांचे नातेवाईक आढळून आले. जयवंशी यांनी रुग्णांच्या १० नातेवाइकांना रुग्णवाहिकेत बसवून कोरोना केअर सेंटरला पाठविले. रुग्णांसोबत नातेवाईक आढळल्यास त्यांना तातडीने कोरोना केअर सेंटरला पाठविण्याच्या सूचनाही आरोग्य कर्मचाऱ्यांना जिल्हाधिकाऱ्यांनी दिल्या.
फोटो : ७