जिल्हा आरोग्य अधिकाऱ्यांना खुलासा सादर करण्याचे आदेश

जिल्हा परिषदेच्या आरोग्य समितीची बैठक ८ एप्रिलला जि. प. उपाध्यक्ष मनीष आखरे यांच्या अध्यक्षतेखाली घेण्यात आली. बैठकीच्या सुरुवातीलाच आखरे यांनी ५ एप्रिलला आरोग्य समितीची बैठक घेण्यासाठी २५ मार्चला दिलेल्या पत्राबाबत विचारणा केली. यावर अंमलबजावणी का झाली नाही? असा थेट सवाल केला. यावर डॉ. पवार यांनी सध्या कामाचा व्याप वाढल्याचे सांगितले. त्यावर सदस्यांनी कोणती कामे केली जात आहेत? अशी विचारणा केली, तर आम्हीसुद्धा कामांचे नियोजन करण्यासाठी बैठक बोलावली होती, सध्या ग्रामीण भागातील आरोग्य यंत्रणा शहरी भागासाठी कामाला लावली जात आहे. त्यामुळे ग्रामीण आरोग्य सेवा कोलमडली आहे. याबाबत काय? नियोजन केले, अशी विचारणा करण्यात आली. त्यावर पवार निरुत्तर झाले. शहरी भागासाठी नव्हे, तर आरोग्यसेवेसाठी काही कर्मचारी तिकडे दिल्याचे सांगत होते. मात्र, सदस्यांनी ग्रामीण जनतेचा आरोग्याची काळजी न घेता असे करणे योग्य नसल्याचे सांगून शहरी भागासाठी कंत्राटी पद्धतीने भरती झाल्यावर ग्रामीण यंत्रणा वापरण्याचे कारण काय? असा सवाल केला. डॉ. पवार यांनी दिलेल्या उत्तरामुळे सदस्यांचे समाधान होत नसल्याने सभापती आखरे यांनी अशा पद्धतीने यंत्रणा वागत असेल तर बैठका कशासाठी घ्यायचा? असा सवाल करीत बैठक तहकूब केली. या बैठकीस जि. प. सदस्य अनुराधा जाधव खंदारे दराडे चंद्रभागा जाधव, आदींची उपस्थिती होती. यावेळी सदस्यांनी आरोग्य अधिकारी व कर्मचारी कमी संख्येने उपस्थित असल्याबाबतही नाराजी व्यक्त केली.