३x३ हा नियम पाळा... ना पोट वाढेल, ना वजन

वजन कमी करणं म्हणजे एक मोठा डोंगर सर करावा, इतकं अवघड काम नाही. त्यासाठी हे ३–३ नियम लक्षात ठेवा.

१.    दिवसातून फक्त ३ वेळा खा

‘जरा भूक लागली की काहीतरी खा’ अशी सवय आपल्याला लागली आहे. पण सतत खाल्ल्याने शरीराला विश्रांती मिळत नाही व चरबी साठते.

३ वेळा जेवणाचे फायदे : 

सकाळचा नाश्ता : हा दिवसातील सर्वात महत्त्वाचा आहार. उकडलेले अंडे, पोहे-उपमा, ओट्स, डाळींचा सूप किंवा फळं यामुळे शरीराला ऊर्जा मिळते.

दुपारचे जेवण : दुपारचा आहार संतुलित असावा. भाजी, डाळ, थोडं भात किंवा पोळी, सॅलड यामुळे शरीराला आवश्यक पोषण मिळतं.

रात्रीचं जेवण : हलकं आणि पचायला सोपं असावं. दही-भात, सूप, डाळींचा कट, किंवा प्रथिनेयुक्त हलका आहार.

टीप : मध्ये मध्ये सतत स्नॅक्स खाणं टाळा. भूक लागल्यास फळं, ड्रायफ्रूट्स किंवा ताकासारखे आरोग्यदायी पर्याय घ्या.

२.    दिवसातून ३ वेळा हालचाल करा

वजन कमी करण्यासाठी व्यायामशाळेतला कार्यक्रम हवाच असं नाही. दिवसातल्या छोट्या-छोट्या हालचालीसुद्धा परिणामकारक ठरतात.

३ वेळा हालचालींचे मार्ग :

सकाळी : झोपेतून उठल्यावर १०–१५ मिनिटं स्ट्रेचिंग, सूर्यनमस्कार किंवा चालणं. यामुळे शरीराला दिवसाची ऊर्जा मिळते.

दुपारी : ऑफिसमध्ये लिफ्टऐवजी जिने वापरा, थोडा वेळ चालत जा, पाय मोकळे करा. हे लहान सत्र पचन सुधारतं आणि थकवा कमी करतं.

संध्याकाळी : २०–३० मिनिटं वेगाने चालणं, सायकलिंग, योगा किंवा हलका व्यायाम. हा व्यायाम दिवसाचा ताण घालवतो आणि चरबी जाळतो.

टीप : वाहनाचा वापर कमी करून पायी चालण्याची सवय लावा. छोट्या हालचालींनीही मोठे परिणाम होतात.

३.    दिवसाला किमान ३ लिटर पाणी प्या

अनेकदा आपल्याला भूक लागल्यासारखं वाटतं, पण ती शरीरातील पाण्याची कमतरता असते. पाणी हे सर्वात परिणामकारक ‘वजन कमी करणारे पेय’ आहे.

३ लिटर पाणी पिण्याचे फायदे:

चरबी जाळायला मदत : पाण्यामुळे मेटाबॉलिझम वेगाने काम करतो.

भूक आटोक्यात राहते : वेळोवेळी पाणी प्यायल्यास अनावश्यक खाणं टाळता येतं.

पचन सुधारतं : टॉक्सिन्स बाहेर टाकले जातात, पोट हलकं राहातं. त्वचेचा तजेला वाढतो. पुरेसं पाणी घेतल्यास त्वचा चमकदार दिसते.

टीप : गोड पेये, सोडा, पॅकेज्ड ज्यूस याऐवजी साधं पाणी, लिंबूपाणी घ्या.