निर्भयतेसाठी पब्लिक कॉल रिस्पॉन्स

महिला व तरुणींच्या सुरक्षिततेसाठी पोलीस प्रशासन कार्य करीत असले तरी देखील कोणत्या न कोणत्या प्रकारे महिला व तरुणींवर अत्याचार वाढतच आहे.

रामनगर पोलिसांचा उपक्रम : महिलांसाठी लावल्या तक्रारपेट्यानरेश रहिले  गोंदियामहिला व तरुणींच्या सुरक्षिततेसाठी पोलीस प्रशासन कार्य करीत असले तरी देखील कोणत्या न कोणत्या प्रकारे महिला व तरुणींवर अत्याचार वाढतच आहे. अशात महिलांना सुरक्षितता प्रदान करण्यासाठी तसेच जनतेलाही निर्भयतेने वागता यावे यासाठी रामनगर पोलिसांनी पब्लिक कॉल रिस्पॉन्स हा उपक्रम सुरू केला आहे. गोंदिया शहरातील शाळा-महाविद्यालय व गर्ल्स होस्टेलमधील विद्यार्थिनींना असुरक्षित वाटू नये तसेच त्या मुलींना त्रास देणाऱ्यांच्या विरोधात नाव गुपित ठेवता सहजरीत्या तक्रार करता यावी यासाठी रामनगर पोलिसांनी उत्तम युक्ती शोधून काढली आहे. यासाठी पोलिसांनी मनोहरभाई पटेल अभियांत्रिकी महाविद्यालय, धोटे बंधू विज्ञान महाविद्यालय, नमाद महाविद्यालय यासह शहरातील शाळा-महाविद्यालयांत कार्यक्रम घेवून विद्यार्थिनींमध्ये जागृती घडवून आणली. मुलींना त्रास देण्याचे काम कुणाकडून होत असेल तर त्या व्यक्तिची तक्रार पोलिसांकडे करा असे आवाहन करण्यात आले. परंतु अनेक तरुणी बदनामीपोटी पोलिस ठाण्यात जात नसल्यामुळे त्यांच्यासाठी शहरातल्या मुख्य आठ ठिकाणी तक्रार पेट्या लावल्या आहेत. महिलांच्या सुरक्षिततेसाठी १०९१ ही हेल्पलाईन तयार करण्यात आली असून महिलांच्या मदतीसाठी दोन व्हॉट्सअ‍ॅप क्रमांक देण्यात आले (९१३००३०५४८, ९१३००३०५४९) आहेत. शासनाने या पब्लिक कॉल रिस्पॉन्सकरिता एक चारचाकी वाहन पाठविले आहे. सोबतच दोन अत्याधुनिक मोटारसायकल राहणार आहेत. एक अधिकारी, एक महिला, एक पुरूष कर्मचारी त्या व्हॅनवर राहणार आहेत. दोन मोटारसायकलवर चार कर्मचारी २४ तास सेवा देणार आहेत. या वाहनावर बसणाऱ्या पोलीसानकडे सायरन वाजणार असून ते शस्त्रधारी राहणार आहेत. वॉकीटाकी त्यांच्याकडे असणार आहे. कोणत्याही ठिकाणी घटना घडली त्या ठिकाणी पोहोचण्याचे काम या व्हॅनवरील व मोटारसायकलवरील कर्मचारी उपस्थित राहाणार आहेत. या क्रमांकावर महिलांनी एक एसएमएसही तक्रार स्वरुपात पाठविला तर त्याची वेळीच दखल घेतली जाईल. या प्रकरणातील तक्रारकर्ती महिला किंवा तरुणीचे नाव गुपित ठेवले जाणार आहे. आलेल्या तक्रारीची शहानिशा केल्यावर सदर प्रकार घडल्याचे तपासी अमलदाराच्या लक्षात येताच त्या व्यक्तीवर गुन्हा दाखल करण्याची प्रक्रियाही रामनगर पोलिस करणार आहेत. महिलांवरील अत्याचारावर आळा बसावा म्हणून रामनगर पोलीस ठाण्यांतर्गत येणाऱ्या विविध मुख्य चौकात आठ तक्रार पेट्या लावण्यात आल्या आहेत. त्यावर हेल्पलाईन क्रमांक व व्हॉट्सअ‍ॅप क्रमांकही नोंदविण्यात आला आहे. महिलांनी घेतली नियंत्रण कक्षाची परीक्षारामनगर पोलिसांचा हा उपक्रम गोंदिया शहरातील महिलांच्या लक्षात येताच महिलांनी पोलिसांच्या कार्यप्रणालित तत्परता आहे किंवा नाही हे ठाणेदारांच्या समोरच तपासून पाहिले. सुधा बनाफर, निशा पाचे व वैद्य या तिन महिलांनी हेल्पलाईन क्रमांकावर कॉल करून रामनगर पोलिस तक्रार घेत नाही असे नियंत्रण कक्षाला सांगितले. क्षणार्धात नियंत्रण कक्षातून रामनगरचे ठाणेदार साहेबराव पवार यांना नियंत्रण कक्षातील सहायक फौजदार तिवारी यांचा फोन आला आणि महिलांनी रामनगर पोलिस तक्रार घेत नाही असे सांगितले. त्यावर ठाणेदार पवार यांनी त्या महिला रामनगर पोलिस ठाण्यातच बसल्या असून त्यांनी जनतेसाठी प्रकाशित झालेल्या क्रमांकावरुन येणाऱ्या कॉलची दखल घेतली जाते किंवा नाही, अशी नियंत्रण कक्षाची परीक्षा घेतल्याचे सांगितले. सूचना पाळा, नुकसान टाळाविविध प्रकरणांना घेवून रामनगर पोलिसांनी आपल्या हद्दीतील प्रत्येक गल्लोगल्लीत जावून नागरिकांना सुचना पाळा, नुकसान टाळा अशा आशयाची सहा हजार पत्रके वाटप केली. बाहेर गावी जाताना रोख रक्कम, दागिणे घरात ठेवू नका, बाहेर गावी जाताना पोलिसांना कळवा, रात्रीच्यावेळी दिवे सुरू ठेवावे, बाहेर गावी जात असल्यास घरातील नोकर व शेजाऱ्यांना माहिती द्यावी अशा विविध प्रकारची माहिती देणाी पत्रके आहेत.