आमगाव : येथील लेफ्टनंट नेव्ही ऑफिसर सौम्य असाटी यांचा विशाखापट्टणम येथे १४ जून रोजी रस्ते अपघातात मृत्यू झाला. सोमवारी (दि. १६) त्यांचे पार्थिव आमगाव येथे आणण्यात आले. हजारो नागरिकांच्या उपस्थितीत व शासकीय इतमामात त्यांच्यावर अंत्यसंस्कार करण्यात आले. आमगाव शहर बंद ठेवून सौम्य असाटी यांना भावपूर्ण श्रद्धांजली अर्पण केली.
सौम्य असाटी यांनी २०२३-२४ मध्ये आर्मी फोर्स मेडिकल महाविद्यालयातून ९ वा क्रमांक प्राप्त करीत एमबीबीएसची परीक्षा उत्तीर्ण केली. इतर कुठेही डॉक्टरची सेवा न देता देशसेवा करण्याच्या हेतूने मे २०२४ ला विशाखापट्टणम येथे पहिली पोस्टिंग सर्जन सब लेफ्टनंट नेव्ही ऑफिसर म्हणून ते रुजू झाले होते. आमगाव शहराच्या इतिहासात पहिल्यांदाच कुणी तरुण नेव्हीमध्ये सर्जन सब लेफ्टनंट नेव्ही ऑफिसर म्हणून नियुक्त झाला होता. यामुळे आमगाव शहराच्या शिरपेचात मानाच्या तुरा रोवला गेला होता. विशाखापट्टणम येथे कर्तव्यावर असताना शनिवारी (दि. १४) सौम्य असाटी व मैत्रीण मेघा रावत हे दोघे दुचाकीने जात असताना हॉर्बर पोलिस स्टेशनच्या कार्यक्षेत्रातील विझाग सिटीजवळ ट्रकने धडक दिली. यात डॉ. सौम्य असाटी व डॉ. मेघा रावत या दोघांचा मृत्यू झाला. या घटनेची माहिती मिळताच आमगावसह जिल्ह्यात शोककळा पसरली. डॉ. सौम्य असाटी यांचे पार्थिव १६ जून रोजी आमगाव येथे आणण्यात आले. यानंतर त्यांच्यावर शासकीय इतमामात अंत्यसंस्कार करण्यात आले.
यांची होती उपस्थिती
या वेळी उपविभागीय अधिकारी कविता गायकवाड, तहसीलदार मोनिका कांबळे, उपविभागीय पोलीस अधिकारी प्रमोद मडामे, पोलिस निरीक्षक तिरुपती राणे, केशव मानकर, नरेश माहेश्वरी, रमेश होतीलाल, संभूदयाल अग्रीका, वडील सतीश असाठी, महेश उके, गोविंद असाटी, वसंत मेहता उपस्थित होते.