सोशल मीडियाचा गैरवापर करणार्‍यांवर करडी नजर

 पणजी : सोशल मीडियावरून द्वेष किंवा जातीय तेढ निर्माण करणार्‍यांवर आता करडी नजर राहाणार आहे. समाजाला चिथावणी देणार्‍या अथवा तशा पद्धतीची आक्षेपार्ह विधाने फेसबुक किंवा अन्य कोणत्याही सोशल मिडियावर करणार्‍यांवर कायदेशीर कारवाई करू, असा इशारा नव्यानेच स्थापन झालेल्या फोरमचे सावियो रॉड्रिग्स यांनी पत्रकार परिषदेत दिला. देऊ चोडणकर याने नरेंद्र मोदी यांच्याबाबत केलेल्या शेरेबाजीवरून निर्माण झालेल्या वादाच्या पार्श्वभूमीवर विविध क्षेत्रांतील नागरिकांनी एकत्र येऊन ‘सोशल मीडिया नॉट अ फोरम टू स्प्रेड हेट्रेड’ या नावाने मंच स्थापन केला आहे. मानसोपचारतज्ज्ञ तथा अभिनेत्री मीनाक्षी मार्टिन्स, गोवा क्रॉनिकलचे सावियो रॉड्रिग्स, गोमंतकीय फेसबुक फोरम गोवा प्लसचे प्रशासक रोहन गोवेकर व चार्टर्ड अकाउंटंट सुनीला मुजावर या मंचचे सदस्य आहेत. मार्टिन्स म्हणाल्या की, गोमंतकीय शांतताप्रिय आहेत; परंतु काहीजण चिथावणी देणारी विधाने सोशल मीडियावरून करतात आणि त्यामुळे तणाव निर्माण होऊ शकतो. अशा लोकांना तसे करण्यापासून परावृत्त करणे आवश्यक आहे. गोमंतकीय शांतताप्रिय आहेत; परंतु चिथावणी दिल्यास काय घडू शकते, हे आपण दहा वर्षांपूर्वी सावर्डे दंगलीच्या वेळी अनुभवले आहे. अभिव्यक्ती स्वातंत्र्य हवेच; परंतु त्याचबरोबर समाजात तेढ निर्माण होईल, असे काही होता कामा नये, असे सावियो म्हणाले. देशाची किंवा राज्याची सुरक्षा, नीतिमूल्ये, बदनामीकारक किंवा सार्वभौमत्वाला बाधा येईल अथवा न्यायालयाचा अवमान होईल, अशी कोणतीही विधाने करण्यास घटनेच्या कलम १९ (२) नुसार निर्बंध आहेत. सोशल मीडियावर आज ज्या पद्धतीची विधाने केली जात आहेत, ती पाहता वेळीच पायबंद न घातल्यास स्थिती हाताबाहेर जाण्याची शक्यता असल्याचे ते म्हणाले. (प्रतिनिधी)