लईराई जत्रोत्सव २०२६: आपत्ती व्यवस्थापनाकडून आदेश; स्टॉल्स, सुरक्षा व गर्दी नियंत्रणासाठी समिती

चेंगराचेंगरीच्या घटनेच्या पार्श्वभूमीवर उच्च न्यायालयाने दिलेल्या सूचनांची दखल घेत प्रशासनाने कठोर पावले उचलली आहेत.

लोकमत न्यूज नेटवर्क, पणजी : शिरगाव येथील देवी लईराईच्या २१ रोजी होणाऱ्या वार्षिक जत्रोत्सवाच्या पार्श्वभूमीवर उत्तर गोवा जिल्हा आपत्ती व्यवस्थापन प्राधिकरणाने कडक आदेश जारी केले आहेत. गर्दी नियंत्रण, सुरक्षा आणि स्टॉल्स व्यवस्थापन यावर विशेष भर देण्यात आला आहे.

गेल्यावर्षी जत्रोत्सवाच्या वेळी झालेल्या चेंगराचेंगरीत ६ जणांचा मृत्यू झाला होता. चेंगराचेंगरीच्या घटनेच्या पार्श्वभूमीवर उच्च न्यायालयाने दिलेल्या सूचनांची दखल घेत प्रशासनाने कठोर पावले उचलली आहेत. यामध्ये जीवितहानी टाळण्यासाठी आणि सुरक्षितता सुनिश्चित करण्यासाठी विविध उपाययोजना करण्याचे निर्देश देण्यात आले आहेत.

फक्त जत्रोत्सवात स्टॉल्स ठरवलेल्या विक्री क्षेत्रातच लावण्यास - परवानगी असेल. मुख्य रस्ते आणि मार्गावर कोणतेही अतिक्रमण होऊ देणार नाही. स्थानिक स्वराज्य संस्था किंवा पंचायत यांना कोणत्याही स्टॉलला परवानगी देण्यापूर्वी जिल्हा आपत्ती व्यवस्थापन प्राधिकरणाची मंजुरी घेणे बंधनकारक असेल. स्टॉल्सच्या मांडणीसाठी आखलेले आराखडे आधीच सादर करणे आवश्यक राहील. विद्युत व अग्निसुरक्षा नियमांचे काटेकोर पालन करणे बंधनकारक केले आहे. नियमांचे उल्लंघन केल्यास कारवाईसह फौजदारी गुन्हा दाखल केला जाऊ शकतो.

विशेष उपसमिती नियुक्त

जत्रेच्या नियोजन आणि अंमलबजावणीसाठी एक विशेष उपसमिती नियुक्त करण्यात आली आहे. डिचोलीचे उपजिल्हाधिकारी या समितीचे अध्यक्ष आहेत. याशिवाय डिचोलीचे पोलिस उपअधीक्षक, अग्निशमन अधिकारी, सार्वजनिक बांधकाम विभागाचे कार्यकारी अभियंता, वीज विभागाचे कार्यकारी अभियंता, देवस्थान व्यवस्थापन समितीचे प्रतिनिधी, शिरगाव पंचायत सचिव हे सदस्य, तर डिचोलीचे मामलेदार सदस्य सचिव आहेत. स्टॉल्सच्या प्रस्तावांची तपासणी करून त्यास मंजुरी देणे, जत्रा परिसरातील अंमलबजावणीवर देखरेख ठेवणे, अनधिकृत स्टॉल्स हटविणे व १० एप्रिलपूर्वी अहवाल सादर करणे ही या समितीची जबाबदारी असेल.