उपजिल्हाधिकाऱ्यांकडून विहीर बांधकामाची पाहणी

येथून जवळच असलेल्या शंकरनगर व पळसगावाला रोहयो उपजिल्हाधिकारी जयंत पिंपळगावकर यांनी भेट देऊन या दोन गावांमधील विहीर, रस्ता बांधकाम व इतर कामांची पाहणी केली.

कामाबाबत मार्गदर्शन : शंकरनगर व पळसगावला भेट
जोगीसाखरा : येथून जवळच असलेल्या शंकरनगर व पळसगावाला रोहयो उपजिल्हाधिकारी जयंत पिंपळगावकर यांनी भेट देऊन या दोन गावांमधील विहीर, रस्ता बांधकाम व इतर कामांची पाहणी केली.
शंकरनगर येथे रोहयो अंतर्गत चार सिमेंट रस्ते, विहीर बांधकाम, पांदन रस्ते, रोपवन, मजगीचे काम करण्यात आली आहेत. या सर्व कामांना पिंपळगावकर यांनी भेट देऊन पाहणी केली. पाहणीदरम्यान अकुशल कामापेक्षा कुशल कामाची टक्केवारी जास्त असल्याचे निदर्शनास आले. अकुशल कामावर केवळ २२ मजूर काम करीत असल्याची माहिती ग्रामरोजगार सेवकाने दिली.
पळसगाव ग्रामपंचायत अंतर्गत पाथरगोटा येथील मजगीचे काम, शेततळे व विहीर बांधकामाला प्रत्यक्ष भेट दिली. नवीन कामासोबतच जुन्या प्रलंबित कामांना जास्त महत्त्व देऊन ती पूर्ण करण्यासाठी प्रयत्न करावा, असे निर्देश उपजिल्हाधिकाऱ्यांनी दिले. यावेळी त्यांच्यासोबत नरेगाचे संवर्ग विकास अधिकारी एस. पी. पडघम, तहसीलदार मनोहर वलथरे, संवर्ग विकास अधिकारी निमजे, शंकरनगरचे सरपंच सुजीत मिस्त्री, अशोक चक्रवती, जनबंधू, सुरेश शेबे, भूपती ढाली, राजू मंडल, सुबोध सरदार, तलाठी टिचकुले, पळसगावचे सरपंच मडावी, उपसरपंच बंडू दोनाडकर, सचिव उद्ध्व प्रधान, ग्राम रोजगार सेवक गणेश मातेरे आदी उपस्थित होते. (वार्ताहर)
शेतकऱ्यांनी सांगितल्या विहीर बांधकामातील अडचणी
सिंचनाची सुविधा उपलब्ध व्हावी यासाठी शंकरनगर येथील अनेक शेतकऱ्यांना सिंचन विहिरी मंजूर करण्यात आल्या आहेत. यात विहिरींचे बांधकाम सुरू आहे. मात्र बऱ्याचवेळा प्रशासनाकडून वेळोवेळी निधी उपलब्ध करून दिल्या जात नाही. त्यामुळे अनेक विहिरींचे बांधकाम रखडले आहे. उपजिल्हाधिकाऱ्यांनी या गंभीर समस्येकडे लक्ष घालून विहिरींचा निधी तत्काळ मंजूर करावा, अशी मागणी शंकरनगर येथील शेतकऱ्यांनी उपजिल्हाधिकाऱ्यांकडे केली.