Separate police control room on 'Corona' situation in Gadchiroli | Corona Virus in Gadchiroli; गडचिरोलीत ‘कोरोना’च्या परिस्थितीवर पोलिसांचा स्वतंत्र नियंत्रण कक्ष

Corona Virus in Gadchiroli; गडचिरोलीत ‘कोरोना’च्या परिस्थितीवर पोलिसांचा स्वतंत्र नियंत्रण कक्ष

ठळक मुद्देसामान्य नागरिकांच्या अडचणी दूर करण्यासाठी ठेवणार समन्वय२४ तास देणार सेवा

लोकमत न्यूज नेटवर्क
गडचिरोली : कारोना विषाणूमुळे (कोव्हिड-१९) उद्भवलेल्या गंभीर परिस्थितीचे निवारण आणि नियंत्रणासाठी सर्वत्र संचारबंदी लागू आहे. याअनुषंगाने गडचिरोली जिल्हा पोलीस दलातर्फे पोलीस अधीक्षक कार्यालय गडचिरोली येथे कोरोना विषाणू साथीच्या रोगाच्या प्रसारास प्रतिबंधक घालण्यासाठी व त्या संदर्भातील उपाययोजना कार्यान्वित करण्यासाठी स्वतंत्र नियंत्रण कक्षाची स्थापना करण्यात आली आहे. यातून सामान्य नागरिकांना मदत व सहकार्य केले जाणार आहे.
या नियंत्रण कक्षाशी सामान्य नागरिकांना थेट संपर्क साधुन त्यांना येत असलेल्या अडचणी सांगता येतील. इतर शासकीय विभागांशी समन्वय साधून त्या अडचणी सोडविण्यासाठी पोलीस मदत करणार आहेत. या कोरोना नियंत्रण कक्षाचे काम तीन शिफ्टमध्ये २४ तास सुरू राहणार आहे. त्यासाठी ३ पोलीस निरीक्षक, ३ सहायक पोलीस निरीक्षक / पोलीस उपनिरीक्षक, १५ कर्मचारी तसेच वाहने व वाहन चालक असे मनुष्यबळ नेमण्यात आले आहे.
वैद्यकीय सेवेबाबत, अत्यावश्यक वस्तू पुरवठा करण्याच्या सेवेबाबत, संशयित रु ग्णाची माहिती देण्यासाठी कोरोना नियंत्रण कक्षाचा उपयोग नागरिकांना करता येईल. दरम्यान जिल्ह्यात आतापर्यंत ३७ लोकांना क्वॉरंटाईन करण्यात आले. त्यापैकी २५ लोकांचा क्वॉरंटाईन कालावधी पूर्ण झाला. अजून १२ जण निरीक्षणाखाली आहेत. एकाचा नमुना शुक्रवारी तपासून झाला, पण त्याचा अहवाल निगेटिव्ह आल्याचे जिल्हा प्रशासनाकडून सांगण्यात आले.
विनाकारण फिरणाऱ्या ३२२ वाहनांवर कारवाई
संचारबंदी लागू असताना बेजबाबदारपणे बाहेर फिरत संचारबंदीचे उल्लंघन करणाºया आणि हुल्लडबाजी करणाºया नागरिकांवर पोलिसांकडून कारवाई केली जात आहे. या संचारबंदीदरम्यान आतापर्यंत ३२२ वाहनांवर मोटार परिवहन कायद्यांतर्गत कारवाई करून त्यांच्याकडून ८१ हजार ७०० रुपयांचा दंड वसूल करण्यात आला. जीवनावश्यक साहित्याची अडचण भासू नये यासाठी शासनाने जीवनावश्यक साहित्याची सेवा देणाºया केंद्रांना सूट दिली आहे. परंतू काही बेजबाबदार नागरिक काही कारण नसताना शहरात फिरताना आढळून आले. त्यांच्यावर कडक कारवाई करण्याचे निर्देश पोलीस अधीक्षक शैलेश बलकवडे यांनी जिल्हाभरातील पोलीस अधिकाऱ्यांना दिले. त्यानुसार ही कारवाई करण्यात आली.


हेल्पपाईन क्रमांक कार्यान्वित
या अनुषंगाने शुक्रवारपासून गडचिरोली जिल्हा पोलीस दलातर्फे हेल्पलाईन क्र मांक सुरु करण्यात आले आहेत. सामान्य नागरिकांना कोरोनासंबंधित कारणाविषयी काही अडचणी असल्यास त्यांनी दिलेल्या क्र मांकावर संपर्क करावे. नियंत्रण कक्षातील अधिकारी सदर हेल्पलाईनवरील तक्र ारीची दखल घेवून तत्काळ प्रतिसाद देतील. त्यासाठी ०७१३२-२२३१४९ आणि ०७१३२-२२३१४२ तसेच व्हॉट्सअ‍ॅप क्र मांक ९४०५८४८७६७, ९४०५८४८७३६, ९४०५८४९१९७ वर संपर्क करता येईल. सदर सेवेचा जास्तीत जास्त नागरिकांनी लाभ घेण्याचे आवाहन पोलीस अधीक्षक शैलेश बलकवडे यांनी केले आहे.


वाहतूक शाखेतर्फे मास्कचे मोफत वाटप
संचारबंदीचे गडचिरोली पोलीस दलाकडून काटेकोरपणे पालन करण्यात येत आहे. फक्त जीवनावश्यक वस्तुंच्या खरेदीसाठी नागरिकांना घरातून बाहेर पडण्याची मुभा दिली जात आहे. नागरिकांकडून देखील याला उत्तम प्रतिसाद मिळत आहे. जिल्हा पोलीस अधीक्षकांनी जिल्हाभरातील नागरिकांनी फक्त जीवनावश्यक वस्तुंच्या खरेदीसाठी व गरज असेल तरच घराबाहेर पडण्याचे आवाहन केले आहे. त्याचबरोबर विनाकारण रस्त्यांवर फिरणाºयांवर पोलिसांकडून कडक कारवाई करण्यात येणार आहे.

Web Title: Separate police control room on 'Corona' situation in Gadchiroli

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.