कोंढाळा-वैनगंगा नदीपात्रातून रेती तस्करी जोमात सुरू

देसाईगंज तालुक्यातील दरवर्षी नदीघाटांचे लिलाव होऊन करोडो रुपयांचा महसूल शासनास एकट्या देसाईगंज तालुक्यातून मिळत असतो. सद्य:स्थितीत नदी घाटांचे लिलाव झाले नसल्याने अवैध रेती चोरीचे प्रमाण वाढून ट्रॅक्टरने व इतर साधनांचा वापर करून विनापरवाना वाहतूक करून रेती चोर मालामाल होत आहेत. कोंढाळा गावानजीकच वैनगंगा नदी आहे. गावानजीक वैनगंगा नदीपात्र असल्याने नेमका याच संधीचा फायदा काही ट्रॅक्टरधारक व इतर घेत असून, नदीपात्रातून अवैध रेतीचा उपसा करून रेती विक्री करीत असल्याचे आढळून येत आहे. रेतीच्या अवैध उपशामुळे नदीपात्र खोलगट स्तरापर्यंत पोहोचले आहे. अंदाजे शेकडो ते हजारो रेती ब्रासचा उपसा यापूर्वी व सद्य:स्थितीत सुरूच आहे. ट्रॅक्टरधारकांचे सर्वत्र धागेदोरे व जाळे पसरलेले असल्याने मोबाइल संपर्काद्वारे सर्वत्र संपर्क करून हालहवाला घेतला जातो व रेतीचा अवैधरीत्या उपसा केला जातो.

रेतीचा अवैधरीत्या उपसा करण्यासाठी रात्री १२ नंतरचा कालावधी रेती चोरांसाठी फलदायी असल्याचे कळते. शासन स्तरावरून कितीही कठोर व ठोस पावले उचलली जात असली तरी अवैध रेतीचा उपसा करून चोरीची रेती विकली जातच आहे. लाखो रुपयांचा दंड आकारूनही दंडाला न जुमानता ‘चलती का नाम गाडी’ असे चित्र निर्माण झाले आहे. शासन स्तरावरून रेती चोरीचे प्रकरण होऊ नये यासाठी आणखी काही बदल करून रेती तस्करीला कसा आळा घालता येईल, यावर उपाययोजना करण्यात यावी, अशी मागणी हाेत आहे. काही दिवसांपूर्वी महसूल प्रशासनाकडून खड्डे खोदले गेले; पण अजून पुन्हा रेती तस्करीकडून खड्डे बुजविली गेली, अशी घटना एकदा नाही तर दोनदा झाली असून, आता रेती तस्करी सुरूच आहे. ये-जा करणाऱ्या रस्त्याची दुर्दशा झाली आहे. स्थानिक ग्रामपंचायत कानाडोळा करीत असल्याचे चित्र आहे.