जिच्यासोबत प्रेमसंबंध तिच्याच पतीने दगडाने ठेचले, अनोळखी मृतदेहाची टॅटूमुळे पटली ओळख; धुळ्यात तरुणाची हत्या करणारा कसा सापडला?

धुळे जिल्ह्यातील एका तरुणाचा कुजलेल्या अवस्थेत मृतदेह सापडला होता. शरीरावर असलेल्या टॅटूमुळे त्याची ओळख पटली आणि त्याने आत्महत्या केली नसल्याचेही शवविच्छेदन अहवालातून समोर आले. 

Dhule Crime: धुळे तालुक्यातील दिवाणमळा शिवारात विहिरीत कुजलेल्या अवस्थेत आढळलेल्या रवी मालचे याने आत्महत्या केली की, त्याची हत्या करण्यात आली, याचा छडा लावण्यात पोलिसांना यश आले आहे. अनैतिक संबंधाच्या रागातून महिलेच्या पतीनेच प्रियकराचा दगडाने ठेचून खून केल्याचे तपासात निष्पन्न झाले. तपासातून ही हत्या असल्याचे स्पष्ट झाल्यानंतर पोलिसांनी आरोपीला अटक केली. 

२६ मार्च रोजी दिवाणमळा येथील एमआयडीसी परिसरात असलेल्या एका विहिरीत ३५ वर्षीय व्यक्तीचा मृतदेह कुजलेल्या अवस्थेत आढळून आला होता. सुरुवातीला हा प्रकार आत्महत्या असल्याचा बनाव रचण्यात गेला होता. 

हत्या केल्याचे कसे आले समोर?

उत्तरीय तपासणीत मृतदेहाच्या डोक्यावर आणि शरीरावर खोलवर जखमा असल्याचे समोर आल्याने घातपाताचा संशय बळावला. पोलिस निरीक्षक शिल्पा पाटील यांच्या नेतृत्वाखाली पथकाने तातडीने तपासाची चक्रे फिरवली.

मयताच्या शरीरावर टॅटू आणि वर्णनावरून तो मृतदेह गावातीलच रवी यशवंत मालचे याचा असल्याची ओळख पटली. गोपनीय माहिती आणि तांत्रिक तपासाच्या आधारे पोलिसांनी गावातील एकाला संशयित म्हणून ताब्यात घेतले. सुरुवातीला उडवाउडवीची उत्तरे देणाऱ्या संशयिताने पोलिसांनी खाक्या दाखवताच गुन्ह्याची कबुली दिली.

रवीचे आरोपीच्या पत्नीसोबत होते संबंध

मयत रवी याचे आरोपीच्या पत्नीशी अनैतिक संबंध होते. याच रागातून १८ मार्च रोजी रात्री आरोपीने रवीला एका निर्जनस्थळी नेले. तिथे दारूच्या नशेत असताना त्याने रवीच्या डोक्यात दगड घालून त्याची हत्या केली. पुरावा नष्ट करण्यासाठी त्याने जखमी रवीला सायकलवर टाकून एमआयडीसीच्या मागील विहिरीत फेकून दिले होते. या प्रकरणी मयत रवीचा भाऊ परमेश्वर मालचे याच्या तक्रारीवरून गुन्हा दाखल करण्यात आला आहे.