अंगणवाडी सेविकांना वापरासाठी देण्यात येणाऱ्या पोषण ट्रॅकर ॲपची तांत्रिक कारणे दूर करून झाल्यावरच हा ट्रॅकर सुरू करावा. तोपर्यंत या पोषण ट्रॅकरच्या अंमलबजावणीला स्थगिती द्यावी, अशी मागणी राज्य अंगणवाडी कर्मचारी संघटनेने केली आहे.
याबाबत संघटनेचे कार्याध्यक्ष युवराज बैसाणे यांनी सांगितले की, याआधीचे ॲप जेमतेम वापरणाऱ्या अंगणवाडी सेविका आता कुठे पूर्ण फंक्शन शिकू लागल्या होत्या. तोवर नवीन ॲप व नवीन माहिती, तिही इंग्रजीत असल्याने जवळजवळ ८० टक्के सेविकांमध्ये या ॲपच्या वापराबाबत तांत्रिक ज्ञान नाही. कारण ॲपचा आग्रह धरण्याआधी त्यांना प्रशिक्षण देणे गरजेचे होते. पोषण ट्रॅकर या ॲपचा वापर केला तरच पगार निघणार असल्याने अंगणवाडी सेविकांमध्ये नाराजी आहे.
मे २०२० पर्यंत अंगणवाड्यांच्या दैनंदिन कामकाजाची माहिती भरली जात होती; परंतु जुन्या ॲपमध्ये काही त्रुटी होत्या म्हणून नवीन ॲप विकसीत केले; परंतु या ॲपमध्ये देखील तांत्रिक अडचणी निर्माण झाल्याने माहिती भरण्यासाठी पुन्हा रजिस्टर वापरण्याचे आदेश दिले. परंतु हे रजिस्टर खरेदी करण्यासाठी शासनाने निधी दिला नाही व रजिस्टरही दिले नाही. हा खर्च अंगणवाडी कार्यकर्तीला करावा लागला. आता पोषण ट्रॅकर ॲपवर काम करण्याचे आदेश केंद्राने दिले आहेत.
अंगणवाडी सेविकांना आपल्या मोबाईलवर हे ॲप डाऊनलोड करावे लागणार आहे; परंतु अनेक सेविकांकडे स्मार्टफोन नाही तसेच अनेक जणांच्या कुटुंबांमध्ये सामूहिक फोन वापरले जातात. सध्या मुलांचे शिक्षण ऑनलाईन पद्धतीने सुरू असल्याने सेविकांना या ॲपवर काम करणे शक्य होणार नाही. त्यामुळे या ट्रेकर्ससाठी खासगी फोन वापरला जाऊ नये तसेच शासनाने त्यांना चांगल्या क्षमतेचा नवीन मोबाईल घ्यावा व रिचार्जचे पैसेही वाढवून द्यावेत. पोषण ट्रॅकर ॲपवर मराठी भाषेचा पर्याय उपलब्ध करावा, सर्वोच्च न्यायालयाच्या निर्णयानुसार आधारकार्डची अट शिथिल करावी, बालकांची उंची मोजण्यासाठी इंच नव्हे तर सेंटिमीटरचा पर्याय उपलब्ध करून द्यावा, अशी मागणी युनियनने केली आहे. शासनाने या प्रश्नात त्वरित लक्ष घालावे, अशी मागणी युनियनचे कार्याध्यक्ष अध्यक्ष युवराज बैसाने यांनी केली आहे.